Chitsoka nditakure

Ini tomu, kata, tende mumuchovha,
Fambefambe, hwindi otanga kunyora,
Tisati tati nepi, oshewedzera takwe,
Pada anyumwa kuti handina nekobiri,
Zvisina chinono, tsvi-i, chiriporipotyo!
Ndopotserwa, kuperekedzwa neshangu!

Hapana yekutamba kutorova tsoka,
Nenzira yepagomo izere zvibayamahure,
Rwedo rurefu, kutosunga dzisimbe,
Pandichati tunhu, pote, tasa nemujinga,
Ndowaraidzwa zvangu nezvandinoona,
Kufadza meso kuti rwedo rwureruke.

Tusikana tunotamba pada paruware,
Paseri pegwenzi majaya anozvuva chabuta,
Apa pane harahwa dzinotamba tsoro,
Apo pabatwa mbavha yavanorova madiro,
Vamwe wakabata mutyo vebhurugwa,
Zvino yokweyiwa kuenda kumapurisa.

Ndatungamidzana nevaviri vanonyengana,
Handikushata nekunyepa kwerume ikoko!
Hanzi ndinogara iko kumadheredhere,
Rudo ibofu, mhandara yogutsurira musoro!
Haaoniwo here kuti shangu yatsveyama?
YekwaMazai, kusingasviki kana michovha.

Pfacha pamusika, zvino dhumadhuma,
Kusanganidza maziso naiye uye hwindi,
Ondinemera hutsotsi nenzwi riri pamusoro,
Ini tana kuramba isati yakora muto,
Aiwa mushure mepfumvu yekufamba netsoka,
Ndinotambira ndiro yesadza, kwete mhosva!

Chando chapisa

Kutapira here kwechivabvu,
Patinogocha takakomba choto,
Mwaka vachinja zvino chorova,
Chando-dutu kubva mabvazuva!

Charova nemutoo vakaminama,
Icho chokwidza hamba mumuti!
Makomo mbu-u nechando-chena!
Chinopona chine mudzimu vacho!

Unochiziva iwe ukachiona?
Choita zvekunaya chimvuramabwe,
Mazai echando asina mukare amboona,
Kubuda panze ndekwevakashinga moyo!

Kutaurirwa hunyimwa gore rino,
Vakafa havana chavakaona!
Zvino chatitambisa chepamusoro,
Kusvika amai vevana vaita mapatya!

Mutanda kutorara uchibaka,
Chando zvochobvunza mutupo,
Hameno kukaita chirimo gore rino,
Totenda dzamwa dzaswera nebenzi!

Kana iyo mvura yaoma chando!
Takapedzisira kuona shuramurove rini?
Mhuka kutomirira rorova nhongonya,
Pada inganyunguduka dzikapedza nyota!

Machinjireiko oita nyika kudai?
Kudonda kwayo kuenda kure nezuva?
Chando zvochorova mwedzi mitanhatu!
Gunyana vepi tichigwagwadzwa kudai?

Chorwadza, tozviputira mabhachi,
Dunhu rose zvoromera mazhin’a,
Nzira yekurwizi yamira kupfumbira,
Vana mushambanegore vavanda.

Rugare

Nyika izere matambudziko,
Asi rugare rwunonaka rwatanga nhamo,
Chirega kukungira hata chisi chako,
Apunyaira haashayi misodzi,
Iye akuti rima uyu ati ugute,
Kuti uwe nerugare rwechokwadi.

Hongu ibongozozo nebopoto,
Paita bishi nemadhunamutuna,
Izvi hazvititadzisi kuva nemuchete,
Chirega kudenha zvakazvigarira,
Wotokunya nguo, rukova rwizi!
Kuti pachedu tive nekuteramira!

Chinotanga rudo nemutsa,
Kubata mabasa akarurama,
Chada moyo chagara hachikoni,
Kuzvidzora nemoyo murefu,
Mufaro nerugare zvotevera,
Ndiko kugadzikana kwepfungwa.

Hushamwari nevamwe hwakadzika,
Patinoteerera zvakadzama nemoyo wese,
Chapinda munzeve chavaridza bonde,
Topindura pasina tsoropodzo,
Rudairo neruremekedzo rwosimbiswa,
Havangaregi kuswedera pedyo nesu!

Upenyu hwenungo irima,
Rugare haruzvikoki senhamo,
Kuti rwushanye kutosunga dzisimbe,
Kana rwasvika zvakare harugarisiki,
Chikuni chagara chinoda mukuchidziri,
Kutomiramira, potse rwopfuurira.

Kana vanyengetera kuna Nyadenga,
Ziva anobatsira anozvibatsira,
Tarenda harichererwi muvhu,
Rinogochwa rakabatwa gumbo,
Kurishandisa kuti riberekane,
Kufadza vadzimu iwe woropafadzwa!

Mabasa avapositori

Ndiye Johwani naSafira,
Vakanzwa kutinhira nechekure,
Zvekubhabhatidzana pasi tsve-e,
Vobva Jerusarema kuenda Canaan,
Kumhanyira kwavanzwa Peturo!

Vorondedzera rwavo rwedo,
Rwurefu rwavakafamba netsoka,
Vachibvunza kune vese vavaona,
Kuti zvimwe vangavana shomana,
Inosimudza kwayafira ngoroyemoto!

Muzvinachitoro Judha akati kwete,
Takuranai nayo isvike pano,
Mubairo vezvisakarurama!
Hamuna kuteerera vanaMedia?
Hatitengeseri vane zvigubhu!

Peturo anetsa uyu!
Oshevedzerwa nepanhepenyuro!
Zvino sirivha nendarama hatina,
Kutosimbisa zvakare tsoka,
Asi hatineti kupembedza madzishe!

Tendeukai! Mudzoke kwamabva!
Tsvagai marata murove sando,
Kugadzira migomo nemadhishi,
Mozonotengesera zvenyu Ijipita,
Imomo makare muHighfields!

Muto wederere

Inhamo here yakadai,
Inoita tidye zvakadai,
Muriwo kana muto rudzii wakadai,
Unenge madzihwa kudai!

Remusango nguva yezhizha,
Kana remapindu nyatando,
Madomasi pamwe nehanyanisi,
Madirativhange, tosanganisa.

Yavira hadyana tozvidira,
Munyu zvese nembiriso,
Pasina, kubva toisa dota,
Tabvuvira zvino tokurungira.

Tabura chiona benyumundiro,
kuseva, kunwa pahuro rotsvedzerera,
Tsima ine bvute yotambura,
Pasina nguva yonyangarika!

Wenhafu isu tazvimbirwa,
Muromo wave pfimbi yemashoko,
Zvorema kusimuka patigere,
Tokotsira parukukwe takatandavara.