Category: Nyanduri

Dukuduri wakafa

Hona vanhu, hona vanhu-we!
(Kamwe kakati – vaneiko, vaneiko-we?)
Kamwe kakati – vane tsenza, vane tsenza-we!
(Kamwe kakati – kumbira tipivevo?)
Kamwe kakati – hatiroyivi here?
(Kamwe kakati – huroyi hwacho huri payi?)
Kamwe kakati – huri mudukuduri!
(Kamwe kakati – dukuduri wakafa!)
Kamwe kakati – haagarwi nhaka-su?
(Kamwe kakati – kuita magarirei?)
Kamwe kakati – simuka tiende-we?
(Kamwe kakati – tiende kupiko-we?)
Kamwe kakati – kunoona uviri-viri hunoenda gova

Ndashuwa kuyaruka

Motomuka hwandambe zhizha rino,
Zvakwakanaya, sunga maviri bedzi,
Uyu osungawo maviri madhonza,
Iwe pamberi kutara maraini embeu,
Uyu otevera mushure meanokandira.

Parinopisa rerudziyakamwe,
Kumurai pamwe, mudzizorodze,
Imi mogara mubvute remuMango,
Mai vanouya neputugadzike,
Nemutangwa chibage chemubindu.

Modzoka kumunda mosadharara,
Moimba tsotsa kurerutsa ndima,
Usingazivi manzwi imbira mumoyo,
Ndaona twana twepapapo kukoma,
Twabvira kare kumhanya nebani.

Mai vogunun’una, vana misikanzwa,
Kubva nhasi hapadyivi rinopisa,
Mukadzi mukuru neshamhu mushure,
Vapinda pfumvu kutukutira ruzhova,
Toseka zvedu nhamo kunga rugare!

Ivo vakomana zvino havadzoki?
Zvavasoenda kare ruzambirambira,
Kuchiri kukokorodza mombe kwega?
Kune mapere, hazvidi kusvipirwa,
Mai hana yaramba kugadzikana!

Ndamborara here

Muchindiona zvenyu madzimai,
Kuuya kutsime runyanhiriri kudai,
Inyasha, muviri wakati rukutu,
Kuziva nzira kungoti ndarovedzera,
Kwandabva kufambira muhope,
Ndamborara here madeko?
Nayoka yavaMafukidze!
Padzinotanga kubata, ikati yapinda,
Panopano yaamo zvakare,
Kotsi-kotsi, iyo pindikiti!
Kungoti ndipinduke, yaamo,
Ndinofunga kanokwana kashanu!
Hazvina papi, nekuseri nekuseri,
Asi baba vatombi ndakambovaudza,
Kuti varebese ruzhova, kusosa,
Iyo zvainoita zvekuvirimuka,
Kana yapinda inodyira nhafu,
Yaneta pedze yowatira imomo,
Kubva ngavagadzirise zvavo danga,
Irege kungobuda pese-pese,
Ko-o zvino ini ndini ndadini?
Iko kumarimuka kwavanoenda,
Ngavadzoke vagare pano pamusha,
Vazvionere zvinhu zvavo vega,
Vandizorodze, a-ah ndaneta ini,
YavaMafukidze inonetsa!

Handichadi peya

Ndobhuye gwinyiso nyamusi,
Kanyi handichaguriko,
Madhodha akona mikonyo,
Haarembi kureketa,
Uyu onini wepamutunhu,
Iye Mutsapato wepamhiri,
Ndumure dzake indururani,
Misakainzwa chakata, kukwesa!
Kwaakondimake fongo,
Echondikaba mupunhuro,
Piriwiri, ndichobude ngazi!
Kubeni ndaimuremekedza,
Hazvina ndaa hazvo!
Chakandya chakaoneka,
Mutanda wakasiye mbare,
Zvemamhuza handidi hangu,
Handichatambi navo peya!

Miedzo yaSatani

Iye Musikavanhu ane chinya,
Kupa nerudyi obvuta neruboshwe,
Kugadzira nzvimbo inodiwa nevese,
Pedze onamatira ipapo muchetura,
Zvino vanaMubviri vapinda pfumvu,
Kufira pakati pemakumbo sengoma!

Kana ivo varume veKaroi voshinha,
Voisa ruzhova pane yavo minda,
Kusosa ikoko kanzvimbo kamwe,
Dai vanyora zvavo pari pahuma,
Kana kuisa magetsi muviri wose,
Paunobata pfudzi wogwinhwa.

Iyo minda yacho yongoti mwi-i,
Yakafashamira senzungu yepachuru!
Ine zvipfuva zvinopaza nguo,
Zvivakashure hazvisi zvigadziko bedzi,
Mazuva’no zvavane mamwe mabasa,
Mavara eshato’bva rimbe remoto!

Zvino kusimira rudzii kwakadaro?
Idzo nhumbi mamvemve chaivo!
Chambuya chikorobho chikawe nani,
Bva pfekai kwadzo dzinovhara mabvi,
Musiye idzo dzakati mbambamba,
Dzinovhenekera nezvakahwanda!

Ziso rakanzi haribi chomuridzi,
Asi chakarembera pasi ndeche vese,
Icho china manenji hachifambisi,
Chinokambaira, kukwezva akariwara,
Nemukorore vavamwene akafuratira,
Dakara adzipwa neganda remhuru!

Zvepano

Ndezvekungonyengerera,
Nguva dzese kungokumbira,
Kuti ma’mwana swederai pedyo?
Zvanzi zvipi, moda kudini kwacho,
Kubva mukai muende kumunda?
Tana, vachamuka nguva yavanoda,
Zvino mutsai zvenyu vana vandibatsire?
Hunzi regai vambosesedza hope,
Tungamirai nemukomana wemombe,
Kusaziva kudzidzisa vevamwe basa,
Venyu vekubereka vakazvambarara,
Iyo rayiro kana kuteerera,
Mudhara zvanzi anopenga,
Richipinda nedivi richibuda neuku,
Mangwana pano kana ndati tasa,
Nhaka yangu yose yongoparara,
Wemombe uya azadza rake danga,
Momupomera humbavha nehuroyi,
Makanganwa pamaiteerera muviri,
Iye aidzidza upenyu kurarama,
Zvepano ndezvekujaidzwa,
Nhasi hapadyivi rinopisa!
Mukai, mukai iye zvino!