BATAI MAPFUMO (Ziva pekuisa X)

Zvavauya kudai hapachina chakanaka,
Rufu urwu, ihondo iyi,
Kukurirwa kana kukunda uku,
Batai mapfumo varume.

Chauya chauya hama,
Kusiri kufa ndekupi?,
Tagara muvhu ndomedu,
Batai mapfumo tione.

Hatingabati kumeso sevana wemakudo,
Tingangotya nerakapinda nyoka,
Yakabika mabwe ikaseva muto yekwaChivi,
Zviedzwa zvinhu ngatiedzei,
Hama batai mapfumo.

Hapana chatingagarira apa,
Kungotarisa setinoyevedzwa,
Tingayuvira tikanzwikwa naani?,
Chivimbo chawo misodzi yedu,
Hama dzinofa batai mapfumo.

Tingatiza tikasvikepi?,
Tichitiza misha tichiti tinoendepi?,
Misha nepfuma yedu tosiira ani?,
Akafa mangani asi anei makunguwo?,
Hatingafuratiri hama batai mapfumo.

Tongopereka zvose tosara nei?,
Topemha isu tichipereka!,
Kufira musango seshiri?,
Ndodyiwa nemakava sendisina hama,
Haapisi batai mapfumo.

Moyo padombo hama,
Kuzvipira isimbaradzo huru,
Kutenda mauri chombo chikuru,
Unotumbura kwete kutumburwa,
Batai mapfumo titumbure mhandu.

NaTafadzwa G Madhina

Kuyanana nekurambana

Kuroorana vaviri,
Vane pfungwa dzakazvimirira,
Zvasiyana zvido nezvivavariro,
Zviuya hazvivanani!

Kana zvizhinji zvikavirirana,
Kubva ndiko kugarisana hukama,
Kuchembedzana kusvika kukwegura,
Pamwepo moona vazukuru vachikura.

Hazvirevi kufanana kwepfungwa,
Asi kuremekedzana mafungiro,
Kupanana nguva yekufema,
Nekuregererana zvisina maturo.

Mumwe oita mai mumwe baba,
Uyu mushandi uyo wotamba nepwere,
Poita muchengeti nemurangi vevana,
Nekubvumidzana kuve zvamuri.

Hongu zvasiyana nechinyakare,
Apo barika raive redzinza,
Dzimba dzichitongwa nehama,
Mopumhwa huroyi nehunyope.

Zvino chave chimanjemanje,
Vaviri vaviri, wetatu muzvinaguhwa,
Watsvaga zano ita une rako,
Usati waenda kuna taisireva!

Miti kana yamera pamwepo,
Hairegi kukwizana kana kune mhepo,
Chivanhu, ndizvo zvinoita rudo,
Vadani ndivo vakani!

Zvarambisisa kubva moparadzana,
Murunyararo, uyu kwake mumwe kwake,
Zvakaenzanirana upfumi mopatsanura,
Pane vana morega kuvengana.

Zviri mudzimba umu

Chepadare chagara munzeve dzavatorwa,
Chemumba ndochiri mumhepo,
Ndiko kunaka kwazvo nekuti pakukutu,
Zviri mudzimba umu, mabasa!

Kuzvireva paruzhinji zvinorema,
Wakwewa sanzu wakwewa namashizha aro,
Kuti rega pawakapfumbata zvonetsa,
Kuzvikurukura hunge vapotswa!

Musaone kunyenama mukati kuseka,
Chiri mumoyo chiri muninga,
Kunyemerera hazvirevi ese matambo,
Ukasadaro unoiridza mhere!

Chakafukidza dzimba idzi matenga,
Dai madziro aya aitaura,
Tainzvirira nekuonerera gore rino,
Kusvika todemba kuti akotse muromo!

Vekunze havazivi chatora nzvimbo,
Tichidya nhoko dzezvironda zuva nezuva,
Chirimo chino kurarira masekesa,
Pamoto takasasika omandikupfeke.

Kutukana nekunyombana,
Makakatanwa nekurikitana,
Tongofungidzira nairo ziso rakazvimba,
Kuti madeko akarohwa nemukadzi.

Mukombe vamadzisahwira

Chakanaka chakanaka sahwira,
Chinwiwa chenyu chinonaka mhani!
Rine horeka, aya matindingoma!
Doro renyu randiomesa gotsi papata,
Kungoti dzvutu, ndadungunurwa!

Tendayi muzvare mubati wezviyo,
Vamandiriri, kuzvigeza nekuzvichenesa,
Kwemazuva manomwe kuzvinyika,
Kana zvomera kubva zvanaka,
Ndikozve kuti hunzi humera.

Vamai ndivo mazvikokota vegango,
Kuhusarudza humera nekuhukanga,
Zvakaenzanirana tarira hwatsvukira,
Nekugadzirisa kubvisa zvinomera,
Pedze vokuyiwa zvakatsetseka.

Ini basa ndinoribatira mberi,
Neangu magate anoziva hwahwa,
Ndokanya masvusvu, shure ndodziyisa,
Zvinyoronyoro kusvika yabuda mhanga,
Toita moyo murefu tichimirira rivire.

Zvino tochinja mupaka,
Torikwatisa mumarimi emoto,
Tokuchidzira, kubvuvira nekukurungira,
Kuti rizhazhire nekuvavira zvaunoda,
Pakare toritonhodza, vave musungwa!

Zvose zvasanganiswa torivirisa zvakare,
Nayo mbiriso ropupuma furo,
Masvusvu todira pedze tosvina mupeta,
Kunhuhwira kwoyambuka mhiri kwedunhu,
Chasara ingoma yendari yaunorwarira.

Haringaregi kunaka mwachewe,
Gona remhamba maoko enyanzvi,
Neziya, hapana hari inovira isina mukuchidziri,
Zvino vakorewa, voshaya nyadzi uchingonwa remahara,
Kuzunza homwe kusvika pamadesa edoro.

Pfumvu yesadza paruzevha

Chakabaya chikatyokera!
Vangu mudzimu vakapakata gona rapedza dzinza,
Ivo vandipa ronda kuti nhunzi dzindidye,
Ndofudzwa nepfumvu kusingaperi,
Kubvira ndichiri mudumbu kupfuura kwamupfigwanebwe,
Harwusi rwendo rwevane hana nhete.

Yangu raramo haitori nguva refu,
Kungoti yarukei zvanzi aibva, kohwai!
Ukasatemwa unochekwa nerakagomara,
Ndosairirwa mutsapi mondotangonetsana nezvipfukuto,
Mviromviro yepfumvu yodongorera muruwanze.

Waita muchena zviri nani unosasikwa pazuva,
Mutema unoitwa zvekukangwa mugango,
Pedze zvonzi ngaaende kuchigayo kwaanotsetseka nyore,
Mashereni anetsa, kuitwa zvekuponderwa muduri,
Waita munyama wekuzvarwa uri zviyo,
Uri wenhamo, chako kukuyiwa nedombo,
Wochemera mai vakaenda kuti vakafa havana chavakaona,
Asi wati wadii, uchanyatsoiona nhamo yacho!

Zvino watsetseka hausisina nemuviri,
Pamoto wodzorerwa, woibata pfumvu zvino!
Kuita zvekupotserwa mumvura inovhaira,
Hanzi ngaakwate arege kubuda ari mbodza,
Woburwa masvusvu tucheche tuite zvekunwa,
Hazvina mudiki, mwana venyoka inyoka,
Vamugoti pavanoti vhu-u, zvanyangara!
Ave manyama amire nerongo, ndoitwa zvokudhindwa,
Uku neuko ndokandwa kumadziro, pedze ndonzi pasi zhi-i!
Pandinozoburwa ndinenge ndotemwa dzapera ropa.

Kushevedza samusha sadza, kushevedza nevaagere navo,
Vose voti fashanu, kuita muonerapamwe chuma chemuzukuru,
Zvino ndakomberedzwa nehofori dzakanwa mukaka dzikaguta,
Zvakati bafafa zvidhuzha navanamukoranebhande vodonha rute,
Idzo nyope nemharapatsetsetse hadzisaririri pakadai,
Kwavari dzavira mutswanda hadzichanetsi kujorera,
Nemazitumbu avo anongofadzwa nguva pfupi,
Ndonzi ju-u! Pamoyo, kubaiwa neziso rembayo.

Muzvinapembe samusha kungoti dinhu,
Chave chipitipiti, kuitwa kanyamakanyama,
Ndikanzi mba neruoko rune mazhin’a, ndonzi gwadu nehasha!
Pfini yeakaguta anongoti nyobvo nyobvo,
Pasina nguva ndaitwa chimwandamwanda,
Vondimonya kusweta itwo turopa twapunyuka pamoto,
Mudziva remuto vavhundu ndobvongonyodzwa,
Ivo vakati dungunu nemhiripiri vondipa munyaviri,
Pandinenge ndati pwiti, ndofema kamweya kaye kokupedzisira,
Ndonamata kuti nyadenga nditorei zvenyu,
Ndobva ndanzi nyamu nechisimba, kukandwa kumanhengatenga!

Ndoti pepu nditure befu, ndayamurwa kubva kuna taisirewa,
Bva maroto, kusaziva kufa!
Kupunyuka muhari kwandaita ndichidonhera muchoto,
Ndochibata zvino chakati tende!
Ndonzi mangu nemavende, kukandwa mukanwa munonhuhwa chidembo,
Ndisati ndati nepi, ndotanga kutsengwa-tsengwa,
Kupakanwa kumatadza nemumazino akaora,
Tumedu twasaririra twonzi deru, kurasirwa kumavere,
Vekukara havamire kufema, kudya kusvika vati dangurangu,
Kudoedza kudya gaka, paanoti fovi ndomudzipa pahuro,
Izvo kupedza nguva, ondinwira mvura ndosara ndati nyakata,
Kuitwa kafiramberi, dekedese ndokunguruka kwemazuva,
Mucherima ndongoti bangwa, vachindibira kese zvako kanokosha kandinako.

Marirangwe pohotsvuka hutonga,
Ndoedza kukanganwa chezuro nehope,
Ndofunga ndapunyuka rutsva rwuya rwemadeko,
Nyamba kwete, ngoma ndiyo ndiyo,
Hapana chakanaka, ndotambiswa chepamusoro!
Kutanga ndanyombwa magobvu nematete,
Manyemwe enhafu kuti sadza rakandizvimbira,
Mano avanamudyahandikori zvanzi tine chirungurira,
Vehura hutete voti hatina kurara nekubuda panze,
Ini ndonzi ndava munya, maradzwa, mutsatsakunya,
Kutaura kuno baba voita zvekundigocha pamarasha,
Mai votanga vandishongedza kundizora dovi,
Vana havana nguva vonditemura ndakadaro,
Neputugadzike ndopisirwa mukanwa,
Rasara iro zvanzi nyikai maheu,
Murombo haaneti weduwe-e!

Vachakudya vanenge vari pachipangano vachisetsana,
Pandinozobuda mubako ave mazvakemazvake, zvino vogomera,
Ndawe nemaperebudzi, chiseko chenyika,
Vose vondiseurira gotsi hapana achada kundiona,
Avengwa anhuhwa, zvino ndati didinya kuimba yangu ndega kure nemusha,
Ndoti zii zvangu, kukotsa muromo,
Handingamuvengi munhu, ibasa rake,
Dzitori tsiye nyoro kundisiya pakahwanda,
Pandinongonetsana bedzi nenhunzi nehonye,
Ane tsinye ndeanokusiya pese pese,
Pfumvu yacho unoiona vadyiwa zvakare nembwa.