Month: December 2018

Asi uchangondida

Zvandakaita zvinorova!
Zvagara zvichikuchemedza,
Zvino zvaunorambira padivi,
Chii chaunoona mudiwa?

Ndinokuregerera nguva zhinji,
Kana sirivha nendarama karibe,
Zvinotaima zvekukupa handina,
Wongoramba wakati neni nama!

Haudi kunzwa parere mwoyo?
Kunomhanyirwa nevezera rako,
Iko kwavanorohwa matumbu,
Zvaunongoswera pedyo neni?

Pfungwa dzamira kushanda,
Nyama kuunyana dzaneta,
Hapasisina zvitsva zvichabuda,
Ndangowa hari yofanzirofa!

Handizivi kuti unobvepi?
Kana mheno kwawakakurira?
Ndinotenda nekuvimba neni,
Vashoma kwazvo vanozvikurira!

Chemutengure

Chemutengure (chemutengure) x4

Chawa chemutengure vhiri rengoro (woye woye) x4

Wanditi mutyairi wandionei (woye woye)
Ndaona bhurugwa rizere dova (woye woye)
Wanditi mukokeri wandionei (woye woye)
Ndaona bhurugwa kuzara tsine (woye woye)

Mukadzi mutyairi haakwiri ngoro (woye woye)
Anongonokora girisi rengoro (woye woye)
Mukadzi wemutyairi haashayi dovi (woye woye)
Anotora girisi okurungira (woye woye)

Ndiro yemutyairi wanzai dovi (woye woye)
Anoti okambura rime ozora (woye woye)
Wanditi mutyairi wandionei (woye woye)
Ndaona girisi rawakazora (woye woye)

Amai vepano nhasi vanatwo (woye woye)
Ndagara ndaona kurova mwana (woye woye)
Huya uone zvaitawo pano (woye woye)
Mamera tsvai nemakonzo, daidza mai (woye woye)

Chinangwa chako ndecheyi

Aikazve, gore rimwe zvaratopera,
Chii zvino chawakaita chisvinu?
Idzo hama neshamwari vakwazisa?
Vamwe varombo, chavanacho bedzi imari!
Makorokoto kuti wakabaya gore rino,
Kana kamweya kacho kangori kenhamo,
Chitora matanho zvichinge mune rinouya.

Tanga nemubvunzo unoti nei?
Nei ndada kuita chinhu ichochi?
Kugadzira mari hachizi chikonzero!
Dzikisa pfungwa uziwe paumire,
Wobvunza vamwe zano une rako!
Kungoti pfungwa dzione kurongeka,
Zvinoita nezvagara zviri zviroto!

Mubvunzo wepiri unoti sei?
Ko-o, ndozvifambisa sei?
Kuti zano rangu ribudirire,
Matanho api andichatora?
Ndiani wandinotaura naye?
Iko ndekupi kwandichazviitira?
Ndotanga rini uye zvinotora nguvai?

Wozoti chii chaizvo chandingaite?
Ndorima munda murefu here?
Kwete nerunhare, kusunga dzisimbe!
Kana wada hako kuita zvemabhazi?
Anobva nepi achinanga kupi?
Kazhinji unotanga nekushandira vamwe,
Uchichengeta mapeni ekutangawo zvako!

Zvinyore pasi zvose zvivavariro,
Wotsunzutira padiki nepadiki,
Usacheuke-cheuke nekutarisa shure,
Hazvibatsiri kushuwira zvevamwe,
Hauzivi kwavanobva nekwavanoenda,
Tora muzira, mhanya wako mutsetse,
Ukangodaro uchakunda chete!

Kupindana kwamakore

Hakuna shamwari pfumbamwe,
Dzinotamba makore mapfumbamwe,
Kupindana kwavo makore,
Nekuchinja kwezvivavariro!

Mafungiro ako egore riya,
Kana achiri iwo nanhasi?
Uri kutambisa nguva rako,
Mutoo, chinja maitiro!

Marwei ndiye mwana wemuno,
Haana kubvira ada kumbobuda,
Anongotenderera mumumana,
Zvino awe pamurume wechina.

Chemusaiziya awe mazvikokota,
Iko kwaanodya mavhidyongo,
Kudhorobhaka kwaanochonera,
Kudzoka kamwe pagore sekisimusi!

VanaTaurai hatichatauri!
Varovera mhiri nyikamukanza,
Vavo vabereki takacherera,
Mumwena sevasina kuzvara!

Wakati zvinorwadza

Zvawaiti zvinorwadza?
Ichokwadi here ndiudze?
Buda pachena ma’mwana,
Ndakaiona ini ngwarati,
Namaziso angu aya, ndomene,
Ichizvara rakacheka nyika,
Ndakariwara, zvisina yambiro,
Ndonzwa neruzha kuti pu-u,
Pondoti tendeu, wanei yabara,
Iyo kana nepadiki kutsukunuka,
Rambei zvayo yakafuratira,
Sepasina nechatora nzvimbo,
Dai isiri imwewo yaiwe pedyo,
Yakazonongedzera nemuromo,
Kufura ingadai isina kumira,
Chirega kundibata kumeso,
Nditarise, mira kubwaira-bwaira,
Dzikama unyatsonditsanangurira,
Chokwadi chaicho chizere,
Zvawakati zvinorwadza?
Marwadzo ini ndinoaziva,
Bata moto uyo tione,
Kuti unodzokorora here?
Mira zvisina maturo, teerera,
Inzwa ruwanze kuchema pwere,
Uchingoti pagore mwana,
Pedze pindu woti zvinorwadza!
Kunyeperwa handidiba hangu,
Gara pasi undijekesere,
Kana wodzoka kwako kumusha?
Dzinza rose karibe musvinu!

Vamwe vaiti ibenzi

Ruzhinji rwaiti anorwara,
Vamwe vakati ibenzi,
Zvikanzi navapfuuri anopenga,
Pane vaiti kukotsira,
Ngaarohwe gwati apepuke!

Vemutsa vakati musadaro,
Moyo murefu wekuregerera,
Hongu, dzakatamba nepwere,
Dzikapoya paya pakudzorerwa,
Kwete, haisi mhaka yake!

Achipenga ngaamhanye bani?
Haarwari uyo, pada inzara,
Ari kuzvuwa makumbo kudaro,
Kuteerera mwiri kwaanoita,
Mupeyi munya nemunjonjo.

Pwere dzoti tuzuru, nde-e!
Pedze dzokwatika kuseka,
Ruzha dzichitevera shure,
Gurumwandira kusvooredza,
Rake bhurugwa risingazivi mberi.

Takazonzwa nerunyerekupe,
Mumasaisai echimanjemanje,
Kuti anonyepa, kutsvaga kupona,
Saidzirai Bhoki muone kumhanya,
Tozonzwa hu-u, bhu-u, yowe-e!