Category: Ngatitandare

Mvengemvenge

Rufaro rwetsinye

Zvako iwe hazvinzwisisike,
Kufara nemisodzi yevamwe,
Magaramoyo, izvi zvinorwadza,
Zvinofadza bedzi wauya nazvo,
Nyemwerero vamwe vakasuwa,
Wagara wakanaka wakarara,
Kumuka chete kungobvotomoka,
Miromo isingamharwi nenhunzi,
Chabatwa nanhingi chakashata,
Nei asina kubvunza rako zano?
Ari kumhepo anonhuwa tsvina,
Nhasi hauna kumuona achigeza,
Uyo anokutaura mazuva ese,
Hameno chaanoda chaunacho,
Kugara muromo uri mumhuno,
Uchinda kuona anokutanga,
Chirega zvako kuzvinetsa,
Rwako ruwanze harutsikwi,
Muramba kukokwa muramba hweni,
Manje zvausingarari zvekumhanya,
Uchinamatira nhamo kune vamwe,
Munzira dzavo kusunga rundaza,
Zvino yavo minyengetero yakasimba,
Iye mwari ndeve munhu wese!

Nhambe muchando-chena

Yedu yekusada kusarira,
Taiweko iko kumakomo!
Tichitamba muchando-chena,
Kukwira takagara pazvituru,
Kudzoka tichikunguruka,
Takapfeka makwati pashangu,
Kuti tinyatsomhanya nebani,
Yaingowe wasara-wasara,
Mazvake-mazvake kudya kwembada,
Watadza kukurumidza kukona,
Pamwe woumburuka muchando,
Dziripo nzira dzavachangotanga,
Zhinji ndedze voti gonei,
Tsvuku nenhema ndedzeshasha,
Vakakura nazvo havadi kana nzira,
Kungoti bangwa nemawere,
Chitaurirwa imi woye-e,
Yaingowe ooooh, aaaah, urrrgh!
Chikakarara nganda reshumba!
Kushanja kune mamwe marudzi?
Kutsvaka chekufa ndicho!

Ndiye wandaitsvaga

Ndiye wandaitsvaga,
Iyeyu ane ndoro chena,
Akajekererawoka pameso,
Kudadisa pane vamwe,
Iro shava, ganda remvura,
Rinopenya senyeredzi,
Anogutsikana nezvaari,
Zvevamwe ndezvevamwe,
Anotsungirira munhamo,
Kufambirana nezvatiri,
Nekupembera pamabiko,
Kuti nhasi ndezveduwo,
Anotarira zviri mberi,
Zviri shure ndezvazviri,
Ane pfungwa dzake oga,
Dzevamwe ndedze zano,
Anondizvarira mhandara,
Nehakamukaka dzemajaya,
Nama, kuramba ari pedyo,
Kuzambira rangu bendekete,
Narini narini kwemakore,
Murufaro nematambudziko!

Rega ndikurume nzeve

Huya ndikuyambire mwanangu,
Chirega kuti tasa pamberi pavakuru,
Gara pasi, zvichati torei nguva,
Handiti wagara wanga wadya?

Nyika yaugere yakanaka kwazvo,
Yaunoshora uchida dzevamwe,
Pameso pako ndeyemanga-manga,
Uchaishuwira mukore unotevera,
Chifara nayo zvinogutsa hana.

Imo mumamana mauchapinda,
Usanyara kuvaratidza dzako nyora,
Haungatizizve mubvuri vako,
Mavanga anoratidza kwaunobva,
Kuti uone kuziva kwawakananga,
Kuda vamwe hunge wazvida pachako!

Dzidza kudya zvakadzikama,
Zvine mwero, kwete kuzvimbirwa,
Zvishoma, usati ndazvionerei,
Sehama dzamai vako pano!
Izvo zvamunorima nemaoko enyu,
Zvinobva kure hazvina anoziva,
Wozvipereka negapu remvura!

Uchawa nesimba zhinji pakuyaruka,
Chiwa chiremera chavari kure,
Unake divi rinotamba neve pedyo,
Uwe muchengeti wemazera ose,
Musimboti wevaduku, vokutarisira,
Usakanganwa kuremekedza vakuru,
Paunoti dzvutu, kupedza nyota,
Ita rimwe uchidira muvhu,
Kupembedza vadzimu, vagokutarira.

Paunozoti kure, wotsvaga shamwari,
Yako yepamwoyo, ine ndoro chena,
Rangarira hapana akarurama zvose,
Mumwe nemumwe ane zvaanotadza,
Asika mukadzi haarohwi mwanangu,
Imbabvu yako, ichengetedze nerudo!

Peta muswe paruzhinji, kuzvininipisa,
Kwete kugara mutonono pane vanyarikani,
Kungobweteketa sedzisimo pane vamwe,
Hupenyu imhindupindu zvaunoona,
Irombe richaenda pakudzoka iduma,
Usaseka vamwe kana uchinge wayambuka,
Hukuru hunoonekwa nekusimudzira vamwe.

Shinja

Ndiripo pamusoro peNyachirongo,
Ndakatarisa bani reMatiashe,
Ndakanuka ndangoshama muromo,
Nyika yakanaka iyi wedu-we!

Kufunga ndakakurira nyika dzino,
Kana neni ndinozviramba,
Ko nei ndaisazviona ndichiyaruka?
Ndichishuwira nzvimbo dzevamwe.

Nguva yafamba ndichingoyewa,
Kana nzara kuinzwa bodo,
Ndatanga ndiri munzviru nenhengeni,
Zvino ndawe mumatohwe nechecheni.

Husavi zvemauro hwarongeka,
Nembwa yangu Muroyindishe,
Katsuro zvese nemhembwe tabata,
Mutikiti tombozorora kwemazuva.

Sehoromba ndodzika kuchiro,
Kuremekedza masango, zvokodoka,
Kuti nonoke, mapere otanga kurira,
Ndikapera nechakapedza mbudzi.

Kusvika nekamufambiro keabaya,
Ma’mwana vachirova kamupururu,
Muruwanze, kunditenda nemutupo,
Misodzi yoita seichadonha.

Zvino vamai vondipa manyemwe,
Kumona tsambakodzi yerukweza,
Kuraudza chembere muto venyama,
Kuda kuti harahwa ifire musango!

Usaonererwa

Rega kuonererwa,
Kudira jecha zvinhu zvavakuru,
Pagurumwandira nekuona vanhu,
Vakomana vanokuvhakachira,
Usiku, mapere otanga kufamba,
Vokugadzirisa kwadikwadi,
Paunoti regai zvangu ndizorore,
Paye dzichangotanga kubata,
Vorova godhi, hazvidi anovhura,
Iwe uchakadzimirwa nehope,
Hazvitori nguva kucherechedza,
Kuti wapinda mutsekwende,
Vozvidziisira zvavo mvura,
Yeputugadzike, magetsi ako,
Poto yako, zingwa revana,
Vachikubvunzurudza chikonzero,
Chaita uvhecherwe paruzhinji,
Wotanga nekundandamira,
Asi chavanacho inguva,
Kusvika voti dadanu-dadanu,
Kutaura kupfuura mufundisi,
Newe zvatokukatyamadzawo,
Asi magumo azvo unoaziva,
Zvino mufaro hapachina,
Ndanzwa pane aridza tsamwa,
Pawatanga kukumbira ruregerero,
Nemisodzi pamatama sepwere,
Wozunzwa, uku neuko semuzhanje,
Zvino vavhura musangano negwati,
Iya mbama chidzipura neganda,
Vokurikita, kutanga nezvigunwe,
Pasi petsoka, pamusoro penzwara,
Rodunduvira ropa pasina rinoerera,
Pedze vokuvaridza nedumbu,
Kwazvo, kukubhura nedanda magaro,
Musana kukwaturwa nechamboko,
Vachikudira mvura urege kufenda,
Zvino muviri vose wati nyakata,
Kuti imvura chete, hapana achaziva,
Runyanhiriri, vokusiya wave kafiramberi,
Vamai vokundundurudza kuchipatara,
Uzowana mukana wekuchenjedza,
Vamwe, kuti musadaro hazviitwi,
Kubva iro zuva ravakati vachadzoka,
Chihwerure, worara wakapfeka bhutsu,
Zvimwe vanokusvikira wakagadzirira,
Pada ukawana mukana wekutiza,
Kukurukura hunge wapotswa!