Month: October 2018

Mabasa avapositori

Ndiye Johwani naSafira,
Vakanzwa kutinhira nechekure,
Zvekubhabhatidzana pasi tsve-e,
Vobva Jerusarema kuenda Canaan,
Kumhanyira kwavanzwa Peturo!

Vorondedzera rwavo rwedo,
Rwurefu rwavakafamba netsoka,
Vachibvunza kune vese vavaona,
Kuti zvimwe vangavana shomana,
Inosimudza kwayafira ngoroyemoto!

Muzvinachitoro Judha akati kwete,
Takuranai nayo isvike pano,
Mubairo vezvisakarurama!
Hamuna kuteerera vanaMedia?
Hatitengeseri vane zvigubhu!

Peturo anetsa uyu!
Oshevedzerwa nepanhepenyuro!
Zvino sirivha nendarama hatina,
Kutosimbisa zvakare tsoka,
Asi hatineti kupembedza madzishe!

Tendeukai! Mudzoke kwamabva!
Tsvagai marata murove sando,
Kugadzira migomo nemadhishi,
Mozonotengesera zvenyu Ijipita,
Imomo makare muHighfields!

Muto wederere

Inhamo here yakadai,
Inoita tidye zvakadai,
Muriwo kana muto rudzii wakadai,
Unenge madzihwa kudai!

Remusango nguva yezhizha,
Kana remapindu nyatando,
Madomasi pamwe nehanyanisi,
Madirativhange, tosanganisa.

Yavira hadyana tozvidira,
Munyu zvese nembiriso,
Pasina, kubva toisa dota,
Tabvuvira zvino tokurungira.

Tabura chiona benyumundiro,
kuseva, kunwa pahuro rotsvedzerera,
Tsima ine bvute yotambura,
Pasina nguva yonyangarika!

Wenhafu isu tazvimbirwa,
Muromo wave pfimbi yemashoko,
Zvorema kusimuka patigere,
Tokotsira parukukwe takatandavara.

Uzondirangarirawo

Mudumbu machema nzara munoda kuguta,
Tinorwushuvira rugare tinorwuda,
Kwariri zambuko enda usaneta,
Chiriko chekupfumbata usagare pasi,
Chikumbiriso mudiwa ndicho ichi,
Chikumbiriso baba wevana ndicho ichi,
Uzondirangarirawo.

Ichi chigutsa wepamoyo,
Zvaunoona zvimhingamupini,
Hazvizopiri gotsi nekuti vapa gotsi,
Zvichandivana zvikobvu nezvitete,
Wawako kure mudiwa,
Wawako kure baba wevana,
Uzondirangarirawo.

Chinangwa kuguta hongu,
Kukohwa munda werugare ishuviro,
Zvauchasangana nazvo zvizhinji,
Zvakasiyana nerugare mavhu nemarara,
Ugozova nemoyo mumwe chete mudiwa,
Murugare nemumatambudziko,
Uzondirangarirawo.

Mhuri ndinosara nayo enda,
Zvichaivana zvichandivanawo,
Hazvineyi kuti haupo ndiripo,
Ndichavavhumbatira sehuku pamazai,
Kunopambara mudiwa usarega enda,
Kunopambara usarega baba wevana,
Usanokoshiwe chete kuti ndiwe jongwe pano.

Enda zvako murume wangu,
Endai zvenyu baba wevana,
Famba zvakanaka murume wangu,
Nemidzimu ikuchengetedze musango dema,
Usanotsindike mwena unobuda ishwa,
Zviviri zvitatu zvapinda munhawa utiyeukewo,
Usanovire muhari yemukaka sebete.

naTafadzwa G Madhina

Kumusha ndiko kumba

Ndaneta kumhanyamhanya,
Pfungwa dzave rushinga,
Hana yaramba kugadzikana,
Ndotswara hundi moyo kumakoto,
Kamukwende taku, simu, tande,
Kuchizororo kunopumhura!

Hazvina kumira zvakanaka,
Iyo yakwavarara yatya,
Ini ndinofa ndagurukuta,
Ndonanga kumusha kunobumhudza,
Takatandavara serunyemba,
Tichibikira vadzimu chekunwa.

Toenda kunofurwa nemhepo,
Tigere mumubvuri wemuuyu,
Kukoka simba ramangwana,
Rufuramhembwe toti nyamu,
Nembwa yangu kunovhima,
Kugura masango anorura.

Kwandinoda kudya ndashuwira,
Nyevhe nedovi,
Gogoya nembambaira,
Maribova nenzarayapera,
Nzimbe ne’pwa,
Nzungu nemagaka!

Tovhaira kutaura kwaabaya,
Kwedu chiropa hachiseveswi sadza,
Tasvikira chinyoro chibage,
Chakabikwa pamwe chakagochwa,
Kana mhandire ine manakire ayo,
Kunesu tine meno edu zvedu!

Hama hadziperi kuvhakachira,
Gaswa rozadzikiswa nekudya,
Patinoswera takadekara,
Tichikurukura dzechinyakare,
Paya tichayaruka pasi chigare,
Tichiseka nhamo kunga rugare!

Dambudzo

Musarera dambudzo,
Rinodzoka rokutambudzai,
Ragara iro pachigaro,
Imi moita varanda!

Ritsvagirei nyaya,
Musangano uriparadze,
Musavarairwe naro,
Dambudzo richakutongai.

Kunyanya imi wechidiki,
Vasingazivi chinonzi hondo,
Zvigadzirisei iye zvino,
Ripere pachine nguva!

Edzai napose pamunogona,
Kurizviringidza-zviringidza,
Pada moripa muchetura,
Zvimwe ringaita kafiramberi!

Zvino ravane mwedzi misere,
Rikaera radzika midzi,
Kuribvisa ichava mhirizhonga,
Nhamo yanamira pane imwe!