Muromo wako

Igaba rako,
Ndiwe mwene waro,
Unoita zvaunoda naro,
Kubhwereketa kana kutaura,
Kuvaka kana kuvondomora,
Asi ziva shoko harivhikwi,
Kana rabuda haridzoki,
Munzeve ravaridza bonde,
Zvaunozunguza musoro,
Iwo muromo uchiti hongu,
Ruzhinji rwoziva ripi zano,
Zvausingamharwi nenhunzi,
Watanga haurembi kureketa,
Vanoenda mhiri vanodzoka,
Funga usati washama,
Urege kutsindira mwena,
Uriwo unobuda ishwa,
Wopfugama nemagokora,
Kukumbira ruregerero,
Zvave kumuridzi vedyira,
Kufuga kana kuvaridza,
Zvawabvira kuvhotomoka,
Kutaura zvisina maturo,
Kun’onon’ora zvakaora,
Chisimuka paugere apo,
Enda unovhiya mbudzi!

Imwe nhamo kuzviparira

Kupfachura ndekwe vakazara nazvo,
Vanoshaya vagara vanodunguzira,
Kumhanya hunge uchiziva nzira,
Vamwe vose zvino kutotsunzutira,
Kunopemha hakuendwi vakatsvinda,
Mucheno vamandiriri vakashongedza,
Makasunga zvidananguva zvemazana,
Emadhora, muchizvidira doro remhiri,
Kufamba pamwe neparamendi yose!
Vanagudzamudungwe, pasi nemudenga,
Zvino ndege yenyu mega munoida yei?
Ko kukwira idzo dzinokwira vamwe,
Muchinokumbira vakapfeka zvikabanga,
Kubasa vanoenda vakatasva bhasikoro,
Mutungamiri anotambira mari shoma,
Imi muchitambirisana zvakapetwa kasere,
Kurara nekudyira muhotera misi yose,
Zvino ichanakidza sei nyika yave rima,
Mwana atenga bhutsu nemari yemagetsi,
Inombowe marii yamunoda zvifambe?
Iyo yamunoswerogurira matunhu,
Zvaisingakwani bhazi kudzoka kumusha,
Inga tine migodhi yendarama vani?
Cherai goridhe tibude munhamo!

Kuchiri kuchema

Kuchiri kuchema kuri kwega here?
Machenere akadaro, Vhisachi panhamo!
Kana zvave zvekutsvaga mugaranhaka,
Tsiyo dzakazorwa nemiromo mitsvuku,
Zvowonge chipoko nemisodzi yenhema!

Kuchema senge mutambo wepwere,
Kusingaoni uyo angouya ari maoko,
Apunyaira rwendo kukubatai maoko,
Mhere inokwetsurwa zvine sarudzo,
Kune bedzi auya akabata chingwa.

Pasvika mukwasha wenyikamukanza,
Pakati pemhere’bva yombosendekwa,
Kutsvaka mubvuri wekumisa motokari,
Ane sikorosikoro yake obvisa mberi,
Zvemhere zvosimudzirwa mbaimbai.

Zvino zvoonge makwikwi pamhuri,
Vana vanyamunhu kuda kushamisira,
Kuti ane mhuri yakatsvindisisa ndiani?
Ko pwere dzinotsvaga chii parufu?
Dzorasa muswe kuswetuka chitunha.

Zvikanzi vemhiri simudzai maoko,
VeMerika vakati toita zvekusimuka,
Vemuno mukwasha afuma kunokama,
Iye pano ari kuvhiya mbudzi yepiri,
Kana usina mari chizvinyararira.

Varamu chikwee sevari pamuchato,
Mumwe adirwa mvura ine makoko,
Vavakidzani vemushakabvu nazvo katya,
Kubara kwasahwira zvainenge mhepo,
Ndicho here chavanoti chizvinozvino?

Nharaunda zvino yongokwenyana!
Chinguri yabvira kutaura nemaziso,
Vamwe vaedza chibhende nemadimikira,
Kuti regai kungwarangwanduka pasina,
Ari pano akafa ochonywa shure nehuku!

Zvino zvichabatsirei kutenga maruva?
Kuita mabiko pamberi peafa nenzara?
Kuuraya mombe vawengi vapfachure?
Bhokisi remari rekucherera muvhu?
Siyai zvenyu honye dziite madiro!

Unorara sei

Uchiziva wakandinyepera,
Kuti uchave neni narini,
Pese paitsika dzako tsoka,
Ndaisawe chinhambwe bodo,
Tichirarama tesakasika nyika,
Ndaiziwei kuti zvichapera?
Kukuona kuchanetsa kudai?
Zvakatanga angori mazuva,
Panopano yave kamwe pagore,
Zvave pachena wave nezvimwe,
Zviri nani muupenyu hwako,
Zvavawe nyikamukanza kudai,
Makore zvino oita kupindana,
Kana kubata zvako runhare!
Dai ndakaziva zuva riye?
Kuti raichazowe rekupedzisira,
Ndakakutsvoda chaiyo yakakosha,
Inoiziva vani, chikanganwahama,
Bva yangova fungiramumoyo,
Handina kana wekuturira,
Zviri pasi pehana yangu,
Kwangowe kutsi kwehope,
Gara zvako vakaziva wangu,
Musi wauchaomerwa neupenyu?
Dzoka ndikupe makomborero,
Unondiona kuya kumatongo,
Pamutohwe pandakaradzikwa.

Manditeya

Chii zvino chamavavarira?
Kunditarisa nebandi reziso,
Ndazviona kare makanditeya,
Yakakura seyi yandakapara?
Kusunga rundaza pandinofamba,
Muchimirira kuona pandinova,
Mugozoti hezvo zvataireva,
Pandaiti tiri kutamba nhabvu,
Nyamba muri mushishi kukava’vhu,
Kunditosvora ndishaye chiedza,
Ndamirira shamhu ine munyu,
Kutaura kuno itori pamushana,
Kubva zivai kuti kuva kwangu?
Hazvirevi kusimukira kwenyu,
Kufara kwegudo panofa murindi,
Rakoshiwa ndiye zvakare murimi!
Kupembedza n’anga ichabata mai.

Iwe umire papi

Ndiyo nyuchi kutsunzutira,
Kufamba paruva rimwe narimwe,
Kukoromora itwo bedzi tunonaka,
Zvishoma nezvishoma kutakura,
Chitarira mavara uone kutsvinda!
Painofamba pese kuyevedza,
Kana wayo muridzo kuteerera,
Kubva mabasa ayo inhapitapi!
Bvunza avo vanoseva neuchi.

Zvino hona nhuzvi zvainota,
Haioni kunaka kwakaita nyika,
Chero pakati pebindu remaruva,
Iri mushishi kutsvaga zvakaora,
Yajaira kumhanyira kuchimbuzi,
Kumuka nhiriri, chidyavanhu,
Dusvura, kuponda vapenyu,
Yoswera nasahwira honye,
Kwachinonhuhwa chidembo,
Iyo kushata nekutarisa!