Munhanga nemugota

Pano une danga radzo mhandara,
Dzinorara sei munhanga gurumwandira kudai?
Ane mhuri kwayo ndeane ndume seni,
Imi mune mhurikadzi zivai kuti vatorwa,
Vachaenda mukasara matarisana nababa vemusha,
Ndipe zvako mbiri ndinopa majaya ekwangu.

Api, magwara ako aya!
Akazvimba maziso nekuswerodongorera,
Vanasikana vangu vachigeza kurwizi,
Kuti chimutanga tione musikana dzosaba,
Kungodonha rute pasina nenzwi rinobuda,
Ako majaya anofira mugota.

Kunyara ndekwedzinza, nhodzero kuna Samusha,
Vanotoda mikombe mitatu kuti vashame muromo,
Mhengeramumba, paruzhinji kungogara vakati zoo,
Dunhu rondipumha mupfuhwira hwepasi penyanza,
Havazivi parinongoti pote tava tega nditsuro magen’a,
Pane basa paye, unotoshaya kuti zvabva nepi.

Usatsvagiridza zvimhingamupini, kusatenda huroyi,
Tsapata rukukwe, utori naye zvake mujenandebvu,
Hauna dambudziko rehope kurota kwawakarambwa,
Ivo vaenda kundari isu tozvifadzavo kumaricho,
Pfuko dzekuzunde ramambo dzinoodza maheu sedoro,
Kushata kwezvimwe ndiko kunaka kwezvimwe.

Wazoti kudii nedama rakanaka randauya naro,
Rega kutsengatsenga, pamunhondo pamusasa,
Urikutambisa nguva ziendakamwe,
Murume murume haana tsvimborume,
Nhasi ndiri gwevedzi, chitomboti husahwira pasi tsve-e,
Siya ndikuchengetera pwere mwachewe.

Ronga zvifambe, umire kubata shaya,
Unoda ndimere man’a here nokufambira,
Dangwe rako rabva zera, ukavarairwa haribudi munhanga,
Anongotuta kamukwende kake, kwangu oita kugana,
Inga vani zvinonzi rooreranai vematongo,
Ndakuruma nzeve, asati aitwa musengabere!

Kugarira hari sembwa

Zviyo zvako hazvina kunyatsokangwa izvi,
Hauzivi mhamba inoshata musi vayabikwa,
Moshora angu magate mashava kuvazva hwahwa,
Nditambidze mhirimo tiite ‘mhoro doro’,
Iri rinotoda chiwenga nditsukute tufodya,
Zvimwe ndikakwewa ndingabvisa kakuzhazhira.

Usaramba sadza, hwahwa hauna mbuva,
Hadyana yechembere iramba varavira,
Vasvitse denhe vatobika, tsambakodzi yakwata,
Vachatoisa yepiri zvatatsikwa naSabhuku,
Nokukara kwake achatodya chingingiya chaSamusha,
Hapana chembwa nhasi tenzi vararira mutakura.

Vamai kuvhaira kumupakurira mbiya yake ega,
Opunyaira zvino nayo yenjera tsima,
Kuti ati ndaguta zvakona n’anga,
Zvaabvira kunwira mvura chirongo chatozeyama,
Nhasi haashambi maoko paanopedza kudya,
Atozvivanira zvigunwe zvekufamba achinanzvira.

Pwere tadzipa muto, hamuzivi chakakodza nguruve,
Chiriporipotyo dzatsvaira chaenga chose,
Mumwe anga oita zvekunwa vamwe vachida kuseva,
Hameno akakurirepi asingazivi kudyira mudariro,
Ndisvitse hwedza iyo ndivadirire zvangu mukaka,
Kana hodzeko kune vanoda zvavo vakakora.

Doro rako mushonga kushata,
Vamai vabika shomanana,
Sabhuku vatsenga muriwo,
Pwere dzapedza mukaka,
Donditambidza zvako pfuko yemaheu,
Ndikatsenga masese pamwe ndingadzinga nzara.

Kukura hakutani

Kukura hakutani, kamwana kanezuro uno?
Kataituma mvura kachiita zvokumhanya,
Mukombe vosara vosvika chave chikamu,
Ndiko kupindana kwamazuva takarivara,
Nhasi zvino rasimba, pasadza chave chigayo,
Kumutuma yangove tana, ongozunguza musoro.

Yowe-e, zvaichanaya inopisa!
Kushinga kubuda panze nezvauri izvi?
Kupfeka marengenya zvanzi mucheno,
Kupedzera mari pamamvemve chaivo,
Guvhudende pachena, shumo yazvo tsakata,
Iye hanya nani chidhoma chekwaChivi.

Sahwira wacho matindingoma panze apo,
Kufamba hukanyaira chipfuwa chiri pamhene,
Siketi uku ungati akasungira bhande faru,
Hapana nehembe yose, mitengo ndoti yaderera?
Chakakosha chagara chinovigiridzwa,
Chemahara ndochinoshongedzwa pese pese.

Iro jaya rako kusimira kwerudzii kwakadaro?
Kurembedza mabhurukwa, nduwe yose panze,
Kufamba hunge dhadha, mukati dzakakwana shanu?
Tarira kuengerera segondo raona zumbu,
Nharo ndimuzivazvose paita mhandara kudai,
Pane angagone chisingagoneke naGona!

Buda panze uzvionere pamhuno sefodya,
Hameno chavabvira kuti serefi, fesibhuku?
Vangaijaira here iya nhamo yatakakura nayo?
Ivo vanongogutswa nguva shoma senzara,
Ungori mudyandigere, chimenyeramukanwa,
Pwere dzanhasi kuda zvakapfava sehonye!

Kusiri kufa ndekupi

Ndiye muwakidzani wandinofungira,
Kuti akaba mbudzi yangu iya chena,
Pandakaishaya akabika zvinonhuhwira,
Kwaturai chaizvo musadzore tsvimbo,
Kusvika asiya nyemba, kufuga rake ega.

Ngatibvute yavo minda minyoro,
Iyo yakapfuma inovapa raramo,
Kana ichinge yaruma vachadzoka zvavo,
Tovapa riya basa remumba yekubikira,
Vachipona nokudya mafufu segonzo.

Bata muroyi wapedza nhiyo dzavahosi,
Kwake kumusha kunozivikanwa nengozi,
Musanyengerera makudo neanokamhina,
Sasikei pamoto pashaye donwe reropa,
Dakara wake mweya yasiyana nenyama.

Munhu mutema, ane ganda gobvu,
Ngaashande; anetsa orohwa gwati,
Riya ganyamuto chidzipura nenyama,
Rake zororo richauya mangwana,
Paachaenda kwamupfigwanebwe.

Tatora minda yedu yechisikirwa,
Zvomopanana paushamwari hwenyu,
Pachenyu, mai nhiya vozvionera,
Vaivepi pamairwa nevapambepfumi,
Muchiora tsoka nemanyeketera.

Tora iyoyo mombe yamashanga,
Muidzidzise chirungu kuverenga,
Bedzi pakati muka, shanda, mhanya,
Mubate kumeso arambe akakotsira,
Akazungaira, ngaabate chakati tende.

Inhamo yemudzanga kurumwa nekutsva,
Huyanga, hazvina hama kana mutorwa,
Chivendekete onongedza chimedure,
Uyu ane udyire, uyo ane hudzvanyiriri,
Ndizvo ndizvo, kusiri kufa ndekupi!

Nyika Dzimu

Yedu nyika inotongwa neVadzimu,
Pamwe neMhondoro dzinosvikirwa,
Dzinotaura ndimi nevari kumhepo,
Dzoturikira kunaMambo mutongigava,
Nehofori dzemakurukota obatsirwa,
Kutungamira ruzhinji pasina saruro.

Masango otipa zvinogutsa dzinza rose,
Miti yemichero nematombo emapfumo,
Howa, huchi, mashonja netsambarafuta,
Ivhu rotipa majuru, ishwa, humbwe nehari,
Mushiri nemhuka dzesango tovana nyama,
Kugachidzana nezvepamusha zvipfuyo.

Gumiguru kungoti vhu-u toita masoso,
Mutambo wekukwezva mvura kunaya,
Tovabikira doro Vadzimu kuombera,
Dundu rose romera manyemwe emhuru,
Siku nesikati todzana, kudya nekunwa,
Nyadenga azvimbirwa’bva orutsa mvura.

Zviri mugwara, inga zvose zvakati tasa,
Zvirango zvoitwa pasina kupaparika,
Vabiki vemandiriri vane magate anonatsa doro,
Vabati venyama vakatendeka vasina neudyire,
Yasasikwa yanuna, zvidhakwa zvodonha rute,
Iro gotora reSvikiro rorega kurasa muswe.

Yaramba kunaya ndiNyadenga aridza tsamwa,
Sabhuku kutomuka pahunotsvuka hutonga,
Ogumbatira nhekwe yefodya kunanga kwaMambo,
Kungoti korokoto, voperekedzana kwaMusikavanhu,
Kunopira zvichemo nekusvitsa maoko kumusoro,
Pakudzoka hairegi kunaya yematsanza.

Chave chamupidigori, misodzi iya rave ziya,
Kusunga dzisimbe torima zvine pundutso,
Maricho adzo mbesa dzemhando nemhando,
Ave maguta zvino tokaka dumbu sengoma,
Todandaura mbira nehwamanda kupa kutenda,
Kupembedza Vadzimu vatinoda samare.

Ndafunga mbire

Ndagarisa muno musango ndaneta,
Kwemakore kuvhima pasina chimuko,
Kubatwa huyanga semombe yemashanga,
Iyo nhava maburi yaramba kuzara,
Ngoroyemoto kushaya kana tsaru zvavo?

Bata homwe unowirwa nechadzimira,
Vanokutorera pamhene pano pamusika,
Gurumwandira zvinotengeswa jahwi,
Kana wembanje vodaidzira madiro,
Rozara bhazi kunanga Kumakomoyo!

Rwendo ndokungurutsa nendangariro,
Ndinongoyeuka bedzi kusimuka kwebhazi,
Asiri andibata bendekete ndatopfuudzwa,
Kuti nyamu ndiburuke, hana kurova nhai,
Ndonzwa chando kudedera serutsanga.

Ndinowana dzakadii hama kumusha,
Makore ose aya kuti vachandirangarira,
Richava nyunyuto here kana rufaro,
Zvave zvekutorovera moyo padombo,
Aniwa haachatyi kufamba mudova.

Babanguwe-e! Ndiwe here mwanangu,
Tarira misodzi yangu mokoto nerufaro,
Maziso hachanyatsooni, wakadii zvako,
Aparwa aparwazve zvichishaya shumo,
Swedera padyo, kana idzo nzeve dzovhara.

Ndafara mambo vangu, chikuru kuonana,
Ndawana pokurevera nhuna dzangu dzose,
Rega ndizokuratidza parere baba vako,
Ivo mabvi kusimuka ave makakatanwa,
Nyama dzaora, tangove hari dzofanzirofa.

Sadza

Maiwe-e! Itsima yahombarume here,
Wasverorimbinyuka muzuva nebasa,
Kubva tinoritema isu vanamadyirapanze,
Nemusuwa weganyabvu rinopera chimbi,
Ndisunungure chuma chiunu chiregedzeke,
Undipe komichi yemvura yakati tundu,
Woudza vavakidzani kuti takatama.

Kuribata basa hunge watsindira rinopisa,
Hakamukaka hofori dzerume idzo kusimba,
Ishe nemachindarume hunge vane mimba,
Kumonya tsima dzine bvute zuva nezuva,
Zvidhuzha kupinda mumba nedivi segakanje,
Zvinotangira pamoto hanzi kuravira hadyana,
Chinokoro kuti tundu nemusuwa muruoko.

Zvinongoda chibage, njera kana zviyo,
Dudu muduri hwoita hwakatsetseka hupfu,
Yavira tsambakodzi wototanga kubika,
Woita zvekukurungira risaita mapundu,
Urege rinyatsokwata ringaita mbodza,
Kungoti monyei bura uzvibaye wega,
Rikazoti nganganga rodzipa pahuro.

Kana makobiri anetsa kubva wotemura,
Asi rinongodaka kuperekedzwa neusawi,
Mashizha ane dovi anongoitavo zvavo,
Chembere dzagunhana kana mutikiti,
Rinotsvedzerera pahuro derere chiororo,
Murwi kunzi dzii pasina nguva waerera,
Inhapitapi, mutakunanzva, gotsi papata.

Kubva nekanyama unoseva ukazvimbirwa,
Usakurumidza kumedza kutsenga uchada,
Yemombe, yembudzi inongonaka parurimi,
Asi sadza nenyama yehuku machikichori,
Mutupo paruzhinji mudzimba umo inyama,
Zvino vamwe tichapera meno mukore uno,
Tingaswerera kubvisa moyo wematemba.

Ndati shamba maoko uzvinokorere,
Manje zvowokumba chaenga chose woga,
Kudya zvekumhanya asi unoera Chihwa,
Une muromo chipfukuto chinopedza dura,
Wakakurira kupi unotimba neruboshwe,
Gogogoi nguva yesadza mangwanamangwana,
Waguta zvekupisa dura, chibva pano!