Tiri vana vamambo

Iyo ngaisiye matambo,
Munozvidenhera zvakazvigarira,
Mukarumwa nechekuchera,
Tiri vana vamambo isu!

Patatsika toita setichanyura,
Ishe ndishe, muranda muranda,
Taramuka panotamba dera,
Ane chake ane manyawi!

Dundundu takamisa mberi!
Kutsenga mvura ichibuda masese,
Hatirovi imbwa takaviga mupini!
Ndezvehuru, doko dzinonyika miswe!

Chiropa kwedu hachiseveswi sadza,
Kwatinodya zvavapfupi nekureba,
Kupfachura, zvimwe tichikandira shiri,
Vana tsuro mokotsa muromo!

Hatisvikirwe, tinosvika tega!
Munyai anotipedzera nguva,
Muswe wekutumira haurebi,
Kugogodza pachedu, mbune!

Kana tati wenyu tamuda?
Tezvara tangai kunyemwerera,
Mwanaka agara muhupfu uyu?
Iye mukunda ndimapfumise!

Chinono chagara ndeche’ngwe,
Tsvimborume inodya yakawaridza,
Roora kubhadhara chiriporipotyo,
Wedu topakata sahombarume!

Zvino makatyamadzwa nei?
Ngezvemo zvimbutu zvamaonde,
Musina kunzwisisa totsanangura,
Benzi bvunza rakanaka!

Hatikendenge, ko kutyei?
Kudada pachena, munotidii?
Kurereka, kuzvityora kudii?
Tiri vana vamambo isu!

Kusina vamai hakuendwi

Tisu majaya hatingaregi kuvhaira,
Ibasa redu kushamisira pane vanhu,
Kazhinji vemanzwi matete vari pedyo,
Asi parinopinda muna amai varo,
Ndipo patozeza kudzoka kuchizororo,
Kusina vamai hakuendwi!

Uchada kudya, kufuga nekupfeka,
Wotobika potse unowata nayo,
Husiku hwese vakapfunya makumbo,
Ihwo ngahurebe, hakuedzi here?
Mhandara woita zvekuonera muhope,
Gangaidzwa, kurota kweakarambwa!

Ipapo gumbeze porotanga kudziya,
Ingwe ndopodzorira, shiri dzichichema,
Mavambakuedza hutonga hwotsvuka,
Ini pepu, tende, simu, ndamuka!
Ndoshamba ivo ano mashambanzou,
Mucheka ndakagara ndasvatanudza.

Ndonanga kumarekete kwandakajaira,
Kunokokoroza, hameno chero chamuka,
Chanza choswinya, ndingangoita rombo rakanaka,
Nhasi ndikadzoka ndakapakata mazana,
Asi kunyanyanyanya chiya chigagairwa,
Chandakapfimba nezuro, chinondida chete!

Chitsoka nditakure

Ini tomu, kata, tende mumuchovha,
Fambefambe, hwindi otanga kunyora,
Tisati tati nepi, oshewedzera takwe,
Pada anyumwa kuti handina nekobiri,
Zvisina chinono, tsvi-i, chiriporipotyo!
Ndopotserwa, kuperekedzwa neshangu!

Hapana yekutamba kutorova tsoka,
Nenzira yepagomo izere zvibayamahure,
Rwedo rurefu, kutosunga dzisimbe,
Pandichati tunhu, pote, tasa nemujinga,
Ndowaraidzwa zvangu nezvandinoona,
Kufadza meso kuti rwedo rwureruke.

Tusikana tunotamba pada paruware,
Paseri pegwenzi majaya anozvuva chabuta,
Apa pane harahwa dzinotamba tsoro,
Apo pabatwa mbavha yavanorova madiro,
Vamwe wakabata mutyo vebhurugwa,
Zvino yokweyiwa kuenda kumapurisa.

Ndatungamidzana nevaviri vanonyengana,
Handikushata nekunyepa kwerume ikoko!
Hanzi ndinogara iko kumadheredhere,
Rudo ibofu, mhandara yogutsurira musoro!
Haaoniwo here kuti shangu yatsveyama?
YekwaMazai, kusingasviki kana michovha.

Pfacha pamusika, zvino dhumadhuma,
Kusanganidza maziso naiye uye hwindi,
Ondinemera hutsotsi nenzwi riri pamusoro,
Ini tana kuramba isati yakora muto,
Aiwa mushure mepfumvu yekufamba netsoka,
Ndinotambira ndiro yesadza, kwete mhosva!

Muto wederere

Inhamo here yakadai,
Inoita tidye zvakadai,
Muriwo kana muto rudzii wakadai,
Unenge madzihwa kudai!

Remusango nguva yezhizha,
Kana remapindu nyatando,
Madomasi pamwe nehanyanisi,
Madirativhange, tosanganisa.

Yavira hadyana tozvidira,
Munyu zvese nembiriso,
Pasina, kubva toisa dota,
Tabvuvira zvino tokurungira.

Tabura chiona benyumundiro,
kuseva, kunwa pahuro rotsvedzerera,
Tsima ine bvute yotambura,
Pasina nguva yonyangarika!

Wenhafu isu tazvimbirwa,
Muromo wave pfimbi yemashoko,
Zvorema kusimuka patigere,
Tokotsira parukukwe takatandavara.

Kumusha ndiko kumba

Ndaneta kumhanyamhanya,
Pfungwa dzave rushinga,
Hana yaramba kugadzikana,
Ndotswara hundi moyo kumakoto,
Kamukwende taku, simu, tande,
Kuchizororo kunopumhura!

Hazvina kumira zvakanaka,
Iyo yakwavarara yatya,
Ini ndinofa ndagurukuta,
Ndonanga kumusha kunobumhudza,
Takatandavara serunyemba,
Tichibikira vadzimu chekunwa.

Toenda kunofurwa nemhepo,
Tigere mumubvuri wemuuyu,
Kukoka simba ramangwana,
Rufuramhembwe toti nyamu,
Nembwa yangu kunovhima,
Kugura masango anorura.

Kwandinoda kudya ndashuwira,
Nyevhe nedovi,
Gogoya nembambaira,
Maribova nenzarayapera,
Nzimbe ne’pwa,
Nzungu nemagaka!

Tovhaira kutaura kwaabaya,
Kwedu chiropa hachiseveswi sadza,
Tasvikira chinyoro chibage,
Chakabikwa pamwe chakagochwa,
Kana mhandire ine manakire ayo,
Kunesu tine meno edu zvedu!

Hama hadziperi kuvhakachira,
Gaswa rozadzikiswa nekudya,
Patinoswera takadekara,
Tichikurukura dzechinyakare,
Paya tichayaruka pasi chigare,
Tichiseka nhamo kunga rugare!