Nhasi igoridhe

Zuro afamba asvava, rave vende,
Hakuchaendwi kana naani zvake,
Mangwana parizvino angori maroto,
Hausviki kana nyadenga akaramba,
Ndosaka ranhasi riri goridhe,
Rirarame zvakazara zvinogutsa hana.

Usashushikana nezvinonetsa nhasi,
Zvichapfuura sekuti uri parwendo,
Pembera kusvika vasvotwa moyo,
Zvamunoona hupenyu idandaro,
Dambakamwe chete seumhandara,
Rapfuura ranhasi dzangove ndangariro.

Takakurira chinhambwe kwaChatikobo,
Kwataipfimba mhandara nemadimikira,
Imba imwe yekutandara ndiyo yekurara,
Kurara here mumba yekubikira semugoti,
Kuona hambautare tichikura mashura,
Kutovhunduka kuti kunze kwashatei.

Nhasi toshora shashiko yakatiyarutsa,
Hembe dzatakaziva apa totevera bunha,
Imwe chete omandikupfeke gore rese,
Bhurugwa rimwe pamhuri yendume ina,
Atanga kumuka musi’wo ndiye anopfeka,
Chitaurirwa mbare dzekumusana!

Harare yaiwe nyikadzino kachana,
Yatakazoziva pano nekugona chikoro,
Kubva kupedza nyota kuenda padziva,
Tikati tiende mbune mhiri kwemakungwa,
Toswerobhururuka munhepo segondo,
Hembe kupfeka kamwe chete nekurasa.

Zvino tosvisvinaka mitauro yevamwe,
Kudzidzisa varungu kutaura chirungu,
Asi rwedu rurimi rwamai tonetseka,
Nekuti tairwutarisira pasi pakuyaruka,
Vana vedu vanhasi kana pakati “baba”,
Rudzi rusina rwavo mutauro rwakafa.

Hupfumi marangwanda, kudya namambo,
Mubhedha uko kurara wakachinjika ndiwe,
Mota mwana yake asika mazvakemazvake,
Vabereki kutukana nekuswedzana kumatare,
Rufaro hapana kuteyana nedovi segonzo,
Moshuva zuro makakomberedzwa nerudo,
Nhasi igoridhe rirarame zvinogadza moyo!

Hama dzemuroora

Ini hameno chandakaona,
Pane wangu iye mwamuna,
Nguva zhinji ana vamwene,
Hazvinei tsapata rukukwe.

Iro godo rinorema ravamwene,
Kutonga zvisinei navo mumba mangu,
Chembere kugarobwereketa mavi,
Inga vamwe vanoroyera kure vani.

Zitete ripi mvana yakazvigarira,
Kurambwa nemurume nekunyima,
Mwana venyoka wagara inyoka,
Chii chaizvo chavangandipanga.

Babamukuru kuperera pazita,
Kutevera ndari kudzoka dzasukwa,
Iko kuonda idoro, harina mbuva,
Ko kutsvaga basa zvinoita vamwe.

Kuroora babamunini kanganwai,
Mbanje nepfambi vanozvivanza,
Mukanwa kunhuhwa chidembo,
Magarisana’bva kutoteya mhepo.

Hama yangu pano ndivatezvara,
Havapindiri nyaya dzisiri dzavo,
Nevana vangu ngirozi dzedenga,
Nhodzero kuneni nerangu dzinza.

Kubudirira kuronga

Mati ihurudza nekuti ane mombe,
Dzaakasiirwa nababa vakaenda,
Ini zvangu ndaramba kuti kwete,
Ane mombe nekuti ihurudza!

Haangochemichemi nguva dzese,
Nyatenga aramba kurutsa mvura,
Chero mbesa dzake dzosvava nezuva,
Sekuti chemukuru anopa omene.

Hove dzinokwira dzine muronga,
Pamunorasa muswe muchirimo,
Hurudza inotsva nezuva kugadzirira,
Kuisa mifudze mune wake munda.

Panozoti gumiguru kana yotinhira,
Murovakamwe nenhimuramwaka,
Nzombe dzake dzafuta nemafuro,
Magejo nembeu zvose zvaringana.

Imi nyope motanga kupaparika,
Nekubwereketa mavi asina maturo,
Kupi kwadzakakorera pamarekete,
Muromo usingamharwi nenhunzi!

Upfumi hauzvikoki kunga urombo,
Kutokwinya nguo kusunga dzisimbe,
Chiri mumuti ndechewagona kukwira,
Zuva rabuda, kubudirira kuronga.

Tsamba kumudiwa

Ndagara pano kwenguva refu,
Asi chandabata woye hapana,
Pfungwa dziri kurekure kwazvo,
Nekufunga iwe neni mudiwa.

Ndoronga mari yekufambisa,
Ndiuye nditore chidochemoyo,
Kana wako baba vakati mombe,
Kubva wotiza zvako neni mukumbo.

Simba ndinaro newe unozviziva,
Kana tichinge tati shandeshande,
Tozodzoka naro jazi ravatezvara,
Nayo mombe inotsika yehumai.

Kana ndinewe zenze kupupira,
Chinouya ngachiuye chione ini,
Bata urwu ruoko rwekuruboshe,
Ndivhike nekuvhura nzira nerudyi.

Anokushusha iye zvivindi zveyi,
Isimba kaviri pandinosvikako,
Muudze atambe nezvimwe,
Arege kufira mafufu segonzo.

Zvichabuda semafungire ako,
Nyadenga otipa vana vatatu,
Mhandara mbiri zvivhindikiti,
Nemuchengeti werangu zita.

Gara nepadivi apa ma’mwana,
Ruzambirambira tigote zuva,
Zvakanzi vani musha mukadzi,
Tabva zera tichichembedzana.

Chirega ndimire kurota mudiwa,
Foromani wodana basa ringapera,
Ivo mapeni ebhazi asati aringana,
Zvikaita manyama amire nerongo.