Kwedu pasichigare

Zvazvo zvingori kutsi kwehope,
Ndasuwa kwedu pasichigare,
Ndinouya pazororo rino!
Tichafara vakoma navazukuru,
Paye tichirondedzera chinyakare!

Sekuru vagara havana muganhu,
Kunyanyanyanya vachinge vakoriva,
Muromo vavo haumharwi nenhunzi,
Vovhotomoka kune wangu mubvakure,
Kuti ndaiiitirapo dakara gwaro rechina!

Kure kwandinobva, kachana!
Nzira idondo, izere tsine nerukato,
Changamuka, rega kuwarairwa,
Ungaera watsika nzvenzvana,
Ivo mago ngemukuvavo!

Nyika yakanaka iyi weduwe-e,
Idzo shiri, magweture nenjiva,
Rekeni yandinayo mangamanga,
Yebhasikoro yagara chipombo,
Haidonhedzi neChisiisii zvacho!

Hwasho ndizvo, dzinovhara minzwa,
Zvibayamahure zvakati chakata,
Bva ndabvira kare ndichirova tsoka,
Sekunge ndinotamba muchongoyo,
Pakuti ndakuwara nemberewere!

Kupona nekusvika kwandaita,
Pondoti pindikiti mumba yekubikira,
Zvorokosho pachigaramakomucha,
Asika maroto, hapana zororo,
Zvigadziko zvozvimba nezvikodza!

Paye ndoeredzwa nendangariro,
Pamwe ndichawa hombarume,
Pada hurudza yamandorokwati,
Zvose zvopedzwa nenzwi guru,
“Muka ugeze uende kuchikoro!”

Unoendepi

Chinobhururuka chinomhara!
Segondo, pedyo naMukuvisi,
Haarare, kutonanga kumabhazi,
Wokwira rinoenda Kumakomoyo!
Chitora befu pamusika wehuku,
Uchitenga zvekusvika wakapakata,
Zvinoremerera, masaki mairi,
Semunhuwozve wabva kure?
Rokoromoka kudzika chamhembe,
Pamharadzano, wotora mabvazuva,
Kungoti fambei romira munyasi,
Pomoburutswa navamutyairi,
Zvanzi rinoremerwa rikati pudzu,
Kukwira Matsororo netsoka,
Kudzoka mubhazi rati tunhu,
Panzira inoenda kwaMutambara,
Ipo modongorera paChimonyo,
Moruyambuka rwetatu Mvumvumvu,
Bva n’ai kwadzo ndedzomucheche,
Dzomukuru dzinoreva kudya,
Vamukokeri vomuzorodza pakare,
Nhedziwa musha mukuru!
Muchitenga tushoma twasaririra,
Madomasi, hanyanisi nekanyama,
Nedoro dzvuku remubhodhoro,
Rekusvika paruzevha makapfumbata,
Nekuzvivaraidza, zvamave pedyo,
Kubva pano zviteshi zvavanda,
Kuti pote masvika paBumba,
Momonyoroka kudzika Raimu,
Yambu Shinja mave paMutsamvu,
Mosiyana nenzira yekwaShinja,
Pedze moyambuka Munyanyazi,
Muuyuweburi moburutsa vamwe,
VeBiriwiri, Mhakwe, Chikwakwa,
Movangarara nemakata, hupoterera,
Ine minzwa ndiyo nzira youshe!
Pasina kutsauka, nanga nemujinga,
Inoenda Chipinge mosiyana nayo,
Dakara mati tunhu pakati pemakomo,
Panonhuhwira zvinanazi zveChikukwa!
Pakati manimani, modongorera Putukezi!

Asi uchangondida

Zvandakaita zvinorova!
Zvagara zvichikuchemedza,
Zvino zvaunorambira padivi,
Chii chaunoona mudiwa?

Ndinokuregerera nguva zhinji,
Kana sirivha nendarama karibe,
Zvinotaima zvekukupa handina,
Wongoramba wakati neni nama!

Haudi kunzwa parere mwoyo?
Kunomhanyirwa nevezera rako,
Iko kwavanorohwa matumbu,
Zvaunongoswera pedyo neni?

Pfungwa dzamira kushanda,
Nyama kuunyana dzaneta,
Hapasisina zvitsva zvichabuda,
Ndangowa hari yofanzirofa!

Handizivi kuti unobvepi?
Kana mheno kwawakakurira?
Ndinotenda nekuvimba neni,
Vashoma kwazvo vanozvikurira!

Chinangwa chako ndecheyi

Aikazve, gore rimwe zvaratopera,
Chii zvino chawakaita chisvinu?
Idzo hama neshamwari vakwazisa?
Vamwe varombo, chavanacho bedzi imari!
Makorokoto kuti wakabaya gore rino,
Kana kamweya kacho kangori kenhamo,
Chitora matanho zvichinge mune rinouya.

Tanga nemubvunzo unoti nei?
Nei ndada kuita chinhu ichochi?
Kugadzira mari hachizi chikonzero!
Dzikisa pfungwa uziwe paumire,
Wobvunza vamwe zano une rako!
Kungoti pfungwa dzione kurongeka,
Zvinoita nezvagara zviri zviroto!

Mubvunzo wepiri unoti sei?
Ko-o, ndozvifambisa sei?
Kuti zano rangu ribudirire,
Matanho api andichatora?
Ndiani wandinotaura naye?
Iko ndekupi kwandichazviitira?
Ndotanga rini zvichitora nguvai?

Wozoti chii chaizvo chandingaite?
Ndorima munda murefu here?
Kwete nerunhare, kusunga dzisimbe!
Kana wada hako kuita zvemabhazi?
Anobva nepi achinanga kupi?
Kazhinji unotanga nekushandira vamwe,
Uchichengeta mapeni ekutangawo zvako!

Zvinyore pasi zvose zvivavariro,
Wotsunzutira padiki nepadiki,
Usacheuke-cheuke nekutarisa shure,
Hazvibatsiri kushuwira zvevamwe,
Hauzivi kwavanobva nekwavanoenda,
Tora muzira, mhanya wako mutsetse,
Ukangodaro uchakunda chete!

Kupindana kwamakore

Hakuna shamwari pfumbamwe,
Dzinotamba makore mapfumbamwe,
Kupindana kwavo makore,
Nekuchinja kwezvivavariro!

Mafungiro ako egore riya,
Kana achiri iwo nanhasi?
Uri kutambisa nguva rako,
Mutoo, chinja maitiro!

Marwei ndiye mwana wemuno,
Haana kubvira ada kumbobuda,
Anongotenderera mumumana,
Zvino awe pamurume wechina.

Chemusaiziya awe mazvikokota,
Iko kwaanodya mavhidyongo,
Kudhorobhaka kwaanochonera,
Kudzoka kamwe pagore sekisimusi!

VanaTaurai hatichatauri!
Varovera mhiri nyikamukanza,
Vavo vabereki takacherera,
Mumwena sevasina kuzvara!

Wakati zvinorwadza

Zvawaiti zvinorwadza?
Ichokwadi here ndiudze?
Buda pachena ma’mwana,
Ndakaiona ini ngwarati,
Namaziso angu aya, ndomene,
Ichizvara rakacheka nyika,
Ndakariwara, zvisina yambiro,
Ndonzwa neruzha kuti pu-u,
Pondoti tendeu, wanei yabara,
Iyo kana nepadiki kutsukunuka,
Rambei zvayo yakafuratira,
Sepasina nechatora nzvimbo,
Dai isiri imwewo yaiwe pedyo,
Yakazonongedzera nemuromo,
Kufura ingadai isina kumira,
Chirega kundibata kumeso,
Nditarise, mira kubwaira-bwaira,
Dzikama unyatsonditsanangurira,
Chokwadi chaicho chizere,
Zvawakati zvinorwadza?
Marwadzo ini ndinoaziva,
Bata moto uyo tione,
Kuti unodzokorora here?
Mira zvisina maturo, teerera,
Inzwa ruwanze kuchema pwere,
Uchingoti pagore mwana,
Pedze pindu woti zvinorwadza!
Kunyeperwa handidiba hangu,
Gara pasi undijekesere,
Kana wodzoka kwako kumusha?
Dzinza rose karibe musvinu!