Usaonererwa

Rega kuonererwa,
Kudira jecha zvinhu zvavakuru,
Pagurumwandira nekuona vanhu,
Vakomana vanokuvhakachira,
Usiku, mapere otanga kufamba,
Vokugadzirisa kwadikwadi,
Paunoti regai zvangu ndizorore,
Paye dzichangotanga kubata,
Vorova goni, hazvidi anovhura,
Iwe uchakadzimirwa nehope,
Hazvitori nguva kucherechedza,
Kuti wapinda mutsekwende,
Vozvidziisira zvavo mvura,
Yeputugadzike, magetsi ako,
Poto yavamai, zingwa revana,
Vachikubvunzurudza chikonzero,
Chaita uvhecherwe paruzhinji,
Wotanga nekundandamira,
Asi chavanacho inguva,
Kusvika voti dadanu-dadanu,
Kutaura kupfuura mufundisi,
Newe zvatokukatyamadzawo,
Asi magumo azvo unoaziva,
Zvino mufaro hapachina,
Ndanzwa pane aridza tsamwa,
Pawatanga kukumbira ruregerero,
Nemisodzi pamatama sepwere,
Wozunzwa, uku neuko semuzhanje,
Zvino vavhura musangano negwati,
Riya zenya chidzipura neganda,
Vokurikita, kutanga nezvigunwe,
Pasi petsoka, pamusoro penzwara,
Rodunduvira ropa pasina rinoerera,
Pedze vokuvaridza nedumbu,
Kwazvo, kukubhura nedanda magaro,
Musana kukwaturwa nechamboko,
Vachikudira mvura urege kufenda,
Zvino muviri vose wati nyakata,
Kuti imvura chete, hapana achaziva,
Runyanhiriri, vokusiya wave kafiramberi,
Vamai vokundundurudza kuchipatara,
Uzowana mukana wekuchenjedza,
Vamwe, kuti musadaro hazviitwi,
Kubva iro zuva ravakati vachadzoka,
Chihwerure, worara wakapfeka bhutsu,
Zvimwe vanokusvikira wakagadzirira,
Pada ukawana mukana wekutiza,
Kukurukura hunge wapotswa!

Hazvindishamisi

Ndakagara zvangu ndazviona,
Kumiramira, vaiwe muchekadzafa,
Nemaziso kuti uri benyumundiro,
Kaendwa haudzoki, musiyadzasukwa,
Mavara kutaima aiwa eshato.

Bva rwagara rudo ibofu,
Poshi, piri, inga vave vashanu,
Kamusarapamba ndakakuzvarira,
Kubva vachatamba mahumbwe,
Haunyariwo here zvino vayaruka?

Shiri ine muririre wayo hairegi!
Ndaingoti kuda zvichashanduka,
Pada nguva, makore ndimufundisi,
Sorojena, zvino wachena nendebvu,
Ndichingoti wega uchaonawo.

Datya hariisvi mumvura inopisa,
Rinotomuka chiriporipotyo rotiza,
Rinokandwa mune inotonhorera,
Yodziiswa mbidyana-mbidyana,
Nenguva, nyorenyore woribika.

Pamwe zvaisvika pakurwadza,
Ndichiti makata kushura materu,
Hakuna rima ringasviba zvakadai?
Chiedza chave kuda kusvika chete!
Zvorokwata rave pedyo nekuibva.

Zvino ndaneta ndongokutarisawo,
Chauya masikati charamba ndima,
Chauya usiku charamba hope,
Madiro, chiita zvako zvaunoda,
Hapana kana zvichandishamisa!

Kutonhodzwa kwaChavukura

Takabvira kare kureva sedimikira,
Hamuigoni nyika musaivhundukira,
Haidyiwe zvemumhanya inozvimbira,
Musaijairire mangamanga ibhindura,
Imi pachenyu ndimi makaivundura,
Zvose zvakanaka mobvumbatira,
Zvakaipa kune vamwe mosundira,
Nhamo pane imwe matsukutira,
Ruzhinji mofudza negotsi kufuratira,
Zvino rwatsamwa rwave kumufungira,
Kusiri kufa ndekupi, rwatozvipira,
Yomotonga nedemo yomupfukira,
Matateguru zvino omumukira,
Vavona misodzi yevana kunyakatira,
Avo matumbu nenzara kukwatamira,
Kana magan’a voita kuvhundikira,
Imi mafufu muchiita zvekukandira,
Muchando honayi zvino modikitira,
Semango, makura motanga kutsvukira,
Iko kuhondo makaenda kabisira,
Venyu vana tichanzwa votanga vovukura,
Baba vakaenda kuhondo vakatisiira,
Haisi yenyu mega, hata regai kukungira,
Tipei mukana muone nyika kusimukira,
Muchapa kutenda moita kugwadamira,
Tasvika isu vechidiki, fundukira!

Murambiwa

Paye parainyenga raihwarara,
Mavara aro achitaima sendarama,
Kana iro sadza taiseva neuchi,
Nyeredzi matsatse payaturuka,
Ndikati ndiyeye wandakarotswa,
Chido chemwoyo chandasarudza.

Ragarisika, zvino radzika midzi,
Ave madhunamutuna zuva nezuva,
Rongozhambatata parakazvambarara,
Zvave pachena, mavara aive eshato,
Nhamo mumba yapfunya chisero,
Tokwara ivhu nemuromo sehuku.

Mazita jahwi ndoshoropodzwa,
Murambiwa gotwe ravamuhure,
Akarambwa pamusaka pekunyima,
Tsvina, rwake ruwanze harutsikwi!
Kunhuhwa, mumba make hamugariki!
Unoona nenhunzi kuti makafira gonzo.

Nevasingakuzivi vanongobvotomoka,
Vanamuzavazi vagara vanongonyeya,
Marevo mavi, ndoudzwa magaramwoyo,
Nemeso matsvuku, ndopumhwa uroyi,
Neukasha, sevaivepo tichadana,
Weduwe-e, musawanza kutaura!

Vakanganwa kuti ravo ndiro dzenga,
Chidhakwa chinongotevera ndari,
Nepfambi dzaanoti usavi hwedoro,
Chisingazivi nepadiki kuti kune vana,
Vanoda kuriritira nekuyarutsa,
Unoshaya chaizvo kuti zvimbori pai!

Ini ndini wavo musikana webasa,
Suku nasai, ndoitwa mugandidzanwa,
Changu kupukuta ipo parutsirwa,
Taurai zvenyu, dzangu zvino dzadambuka,
Murambiwa ndotambira nemaoko maviri,
Handingagariri ivo mashura akadai!

Nhasi vanatwo

Mbudzi ichakarodya nyama!
Ndagara ndazviona karekare,
Amai vepano nhasi vanatwo,
Maroverwe ari kuitwa mwana?

Iko kanyama kasina godo,
Kamupungurunje kandinodisisa,
Nhodzero, mumhu nezviito,
Nyeredzi pameso zvese nenjere!

Paanoti nzve-e shamhu yeMupenga,
Manenji, kupinyura mapfihwa,
Hadyana yose kudubu, bheu!
Ochiona zvino chakapedza mbudzi!

Zvino rangu simba zvaraparara?
Rakaenda ikwo kwakaenda makore,
Kudoti svaa hapana achandinzwa,
Ndoita sendadira parafini muchoto!

Kupoterera, ndazviziva idimikira,
Agara matukirwe aSamusha,
Kunema pwere yavanofarira,
Kufanana nababa kunoparira!

Ini mandigere muberere simu!
Rekeni nemiseve yangu nyamu,
Ndonanga masango anorira pfeni,
Regai nditaraukire mhanduwe!