Zviri mudzimba umu

Chepadare chagara munzeve dzavatorwa,
Chemumba ndochiri mumhepo,
Ndiko kunaka kwazvo nekuti pakukutu,
Zviri mudzimba umu, mabasa!

Kuzvireva paruzhinji zvinorema,
Wakwewa sanzu wakwewa namashizha aro,
Kuti rega pawakapfumbata zvonetsa,
Kuzvikurukura hunge vapotswa!

Musaone kunyenama mukati kuseka,
Chiri mumoyo chiri muninga,
Kunyemerera hazvirevi ese matambo,
Ukasadaro unoiridza mhere!

Chakafukidza dzimba idzi matenga,
Dai madziro aya aitaura,
Tainzvirira nekuonerera gore rino,
Kusvika todemba kuti akotse muromo!

Vekunze havazivi chatora nzvimbo,
Tichidya nhoko dzezvironda zuva nezuva,
Chirimo chino kurarira masekesa,
Pamoto takasasika omandikupfeke.

Kutukana nekunyombana,
Makakatanwa nekurikitana,
Tongofungidzira nairo ziso rakazvimba,
Kuti madeko akarohwa nemukadzi.

Mukombe vamadzisahwira

Chakanaka chakanaka sahwira,
Chinwiwa chenyu chinonaka mhani!
Rine horeka, aya matindingoma!
Doro renyu randiomesa gotsi papata,
Kungoti dzvutu, ndadungunurwa!

Tendayi muzvare mubati wezviyo,
Vamandiriri, kuzvigeza nekuzvichenesa,
Kwemazuva manomwe kuzvinyika,
Kana zvomera kubva zvanaka,
Ndikozve kuti hunzi humera.

Vamai ndivo mazvikokota vegango,
Kuhusarudza humera nekuhukanga,
Zvakaenzanirana tarira hwatsvukira,
Nekugadzirisa kubvisa zvinomera,
Pedze vokuyiwa zvakatsetseka.

Ini basa ndinoribatira mberi,
Neangu magate anoziva hwahwa,
Ndokanya masvusvu, shure ndodziyisa,
Zvinyoronyoro kusvika yabuda mhanga,
Toita moyo murefu tichimirira rivire.

Zvino tochinja mupaka,
Torikwatisa mumarimi emoto,
Tokuchidzira, kubvuvira nekukurungira,
Kuti rizhazhire nekuvavira zvaunoda,
Pakare toritonhodza, vave musungwa!

Zvose zvasanganiswa torivirisa zvakare,
Nayo mbiriso ropupuma furo,
Masvusvu todira pedze tosvina mupeta,
Kunhuhwira kwoyambuka mhiri kwedunhu,
Chasara ingoma yendari yaunorwarira.

Haringaregi kunaka mwachewe,
Gona remhamba maoko enyanzvi,
Neziya, hapana hari inovira isina mukuchidziri,
Zvino vakorewa, voshaya nyadzi uchingonwa remahara,
Kuzunza homwe kusvika pamadesa edoro.

Pfumvu yesadza paruzevha

Chakabaya chikatyokera!
Vangu mudzimu vakapakata gona rapedza dzinza,
Ivo vandipa ronda kuti nhunzi dzindidye,
Ndofudzwa nepfumvu kusingaperi,
Kubvira ndichiri mudumbu kupfuura kwamupfigwanebwe,
Harwusi rwendo rwevane hana nhete.

Yangu raramo haitori nguva refu,
Kungoti yarukei zvanzi aibva, kohwai!
Ukasatemwa unochekwa nerakagomara,
Ndosairirwa mutsapi mondotangonetsana nezvipfukuto,
Mviromviro yepfumvu yodongorera muruwanze.

Waita muchena zviri nani unosasikwa pazuva,
Mutema unoitwa zvekukangwa mugango!
Pedze zvonzi ngaaende kuchigayo kwaanotsetseka nyore,
Mashereni anetsa, kuitwa zvekuponderwa muduri,
Waita munyama wekuzvarwa uri zviyo?
Uri wenhamo, chako kukuyiwa nedombo,
Wochemera mai vakaenda kuti vakafa havana chavakaona,
Asi wati wadii, uchanyatsoiona nhamo yacho!

Zvino watsetseka hausisina nemuviri,
Pamoto wodzorerwa, woibata pfumvu zvino!
Kuita zvekupotserwa mumvura inovhaira,
Hanzi ngaakwate arege kubuda ari mbodza,
Woburwa masvusvu tucheche tuite zvekunwa,
Hazvina mudiki, mwana venyoka inyoka,
Vamugoti pavanoti vhu-u, zvinhu zvanyangara!
Ave manyama amire nerongo, ndoitwa zvokudhindwa,
Uku neuko ndokandwa kumadziro, pedze ndonzi pasi zhi-i!
Pandinozoburwa, ndinenge ndotemwa dzapera ropa.

Kushevedza samusha sadza, kushevedza nevaagere navo,
Vose voti fashanu, kuita muonerapamwe chuma chemuzukuru,
Zvino ndakomberedzwa nehofori dzakanwa mukaka dzikaguta,
Zvakati bafafa zvidhuzha navanamukoranebhande vodonha rute,
Idzo nyope nemharapatsetsetse hadzisaririri pakadai,
Kwavari dzavira mutswanda hadzichanetsi kujorera,
Nemazitumbu avo anongofadzwa nguva pfupi,
Ndonzi ju-u! Pamoyo, kubaiwa neziso rembayo.

Muzvinapembe samusha kungoti dinhu,
Chave chipitipiti, kuitwa kanyamakanyama,
Ndikanzi mba neruoko rune mazhin’a, ndonzi gwadu nehasha!
Pfini yeakaguta anongoti nyobvo nyobvo,
Pasina nguva ndaitwa chimwandamwanda,
Vondimonya kusweta itwo turopa twapunyuka pamoto,
Mudziva remuto vavhundu ndobvongonyodzwa,
Ivo vakati dungunu nemhiripiri vondipa munyaviri,
Pandinenge ndati pwiti, ndofema kamweya kaye kokupedzisira,
Ndonamata kuti nyadenga nditorei zvenyu,
Ndobva ndanzi nyamu nechisimba, kukandwa kumanhengatenga!

Ndoti pepu nditure befu, ndayamurwa kubva kuna taisirewa,
Bva maroto, kusaziva kufa!
Kupunyuka muhari kwandaita ndichidonhera muchoto,
Ndochibata zvino chakati tende!
Ndonzi mangu nemavende, kukandwa mukanwa munonhuhwa chidembo,
Ndisati ndati nepi, ndotanga kutsengwa-tsengwa,
Kupakanwa kumatadza nemumazino akaora,
Tumedu twasaririra twonzi deru, kurasirwa kumavere,
Vekukara havamire kufema, kudya kusvika vati dangurangu,
Kudoedza kudya gaka, paanoti fovi ndomudzipa pahuro,
Izvo kupedza nguva, ondinwira mvura ndosara ndati nyakata,
Kuitwa kafiramberi, dekedese ndokunguruka kwemazuva,
Mucherima ndongoti bangwa, vachindibira kese zvako kanokosha kandinako.

Marirangwe pohotsvuka hutonga,
Ndoedza kukanganwa chezuro nehope,
Ndofunga ndapunyuka rutsva rwuya rwemadeko,
Nyamba kwete, ngoma ndiyo ndiyo!
Hapana chakanaka, ndotambiswa chepamusoro!
Kutanga ndanyombwa magobvu nematete,
Manyemwe enhafu kuti sadza rakandizvimbira,
Mano avanamudyahandikori zvanzi tine chirungurira,
Vehura hutete voti hatina kurara nekubuda panze,
Ini ndonzi ndava munya, maradzwa, mutsatsakunya,
Kutaura kuno baba voita zvekundigocha pamarasha,
Mai votanga vandishongedza, kundizora dovi,
Vana havana nguva vonditemura ndakadaro,
Neputugadzike ndopisirwa mukanwa,
Rasara iro zvanzi nyikai maheu,
Murombo haaneti weduwe-e!

Vachakudya vanenge vari pachipangano vachisetsana,
Pandinozobuda mubako ave mazvakemazvake, zvino vogomera,
Ndawe nemaperebudzi, chiseko chenyika,
Vose vondiseurira gotsi hapana achada kundiona,
Avengwa anhuhwa, zvino ndati didinya kuimba yangu ndega kure nemusha,
Ndoti zii zvangu, kukotsa muromo,
Handingamuvengi munhu, ibasa rake,
Dzitori tsiye nyoro kundisiya pakahwanda,
Pandinongonetsana bedzi nenhunzi nehonye,
Ane tsinye ndeanokusiya pese pese,
Pfumvu yacho unoiona vadyiwa zvakare nembwa.

Kugarira hari sembwa

Zviyo zvako hazvina kunyatsokangwa izvi,
Hauzivi mhamba inoshata musi vayabikwa,
Moshora angu magate mashava kuvazva hwahwa,
Nditambidze mhirimo tiite ‘mhoro doro’,
Iri rinotoda chiwenga nditsukute tufodya,
Zvimwe ndikakwewa ndingabvisa kakuzhazhira.

Usaramba sadza, hwahwa hauna mbuva,
Hadyana yechembere iramba varavira,
Vasvitse denhe vatobika, tsambakodzi yakwata,
Vachatoisa yepiri zvatatsikwa naSabhuku,
Nokukara kwake achatodya chingingiya chaSamusha,
Hapana chembwa nhasi tenzi vararira mutakura.

Vamai kuvhaira kumupakurira mbiya yake ega,
Opunyaira zvino nayo yenjera tsima,
Kuti ati ndaguta zvakona n’anga,
Zvaabvira kunwira mvura chirongo chatozeyama,
Nhasi haashambi maoko paanopedza kudya,
Atozvivanira zvigunwe zvekufamba achinanzvira.

Pwere tadzipa muto, hamuzivi chakakodza nguruve,
Chiriporipotyo dzatsvaira chaenga chose,
Mumwe anga oita zvekunwa vamwe vachida kuseva,
Hameno akakurirepi asingazivi kudyira mudariro,
Ndisvitse hwedza iyo ndivadirire zvangu mukaka,
Kana hodzeko kune vanoda zvavo vakakora.

Doro rako mushonga kushata,
Vamai vabika shomanana,
Sabhuku vatsenga muriwo,
Pwere dzapedza mukaka,
Donditambidza zvako pfuko yemaheu,
Ndikatsenga masese pamwe ndingadzinga nzara.

Kukura hakutani

Kukura hakutani, kamwana kanezuro uno?
Kataituma mvura kachiita zvokumhanya,
Mukombe vosara vosvika chave chikamu,
Ndiko kupindana kwamazuva takarivara,
Nhasi zvino rasimba, pasadza chave chigayo,
Kumutuma yangove tana, ongozunguza musoro.

Yowe-e, zvaichanaya inopisa!
Kushinga kubuda panze nezvauri izvi?
Kupfeka marengenya zvanzi mucheno,
Kupedzera mari pamamvemve chaivo,
Guvhudende pachena, shumo yazvo tsakata,
Iye hanya nani chidhoma chekwaChivi.

Sahwira wacho matindingoma panze apo,
Kufamba hukanyaira chipfuwa chiri pamhene,
Siketi uku ungati akasungira bhande faru,
Hapana nehembe yose, mitengo ndoti yaderera?
Chakakosha chagara chinovigiridzwa,
Chemahara ndochinoshongedzwa pese pese.

Iro jaya rako kusimira kwerudzii kwakadaro?
Kurembedza mabhurukwa, nduwe yose panze,
Kufamba hunge dhadha, mukati dzakakwana shanu?
Tarira kuengerera segondo raona zumbu,
Nharo ndimuzivazvose paita mhandara kudai,
Pane angagone chisingagoneke naGona!

Buda panze uzvionere pamhuno sefodya,
Hameno chavabvira kuti serefi, fesibhuku?
Vangaijaira here iya nhamo yatakakura nayo?
Ivo vanongogutswa nguva shoma senzara,
Ungori mudyandigere, chimenyeramukanwa,
Pwere dzanhasi kuda zvakapfava sehonye!

Mutsetse

Dzidza kumira mumutsetse zvakanaka,
Ngaururame urege kunzvenganzvenga,
Iwe vanonoka enda uko kumashure,
Dai waida kumira nasahwira wamukira,
Nhasi uchawa wekupedzisira kubatsirwa.

Ndaizivei kuti ndiri kudzidza hupenyu,
Mutsetse, chaicho chidzidzo chamandiriri,
Kupfuura svomho naidzo nyaudzosingwi,
Nhasi ndivo magariro muneyechisikirwa,
Kari kai zvako, kutomira mumutsetse!

Vekutsvaga mari mubhangi vakaroyiwa,
Kutorara uripo kuti umukire mberi,
Svondo rose, ikwane yekubhadhara imba,
Waita rombo rakanaka unowana mashereni,
Hamuchina mubhangi yave mumasutukezi.

Wekuzvitupa mutsetse ndivo une nharo,
Hauzivikanwi kwaunotangira nekuperera,
Ringori gonyo kupera hapana pakarurama,
Munonyengana mukadanana imo mumutsetse,
Monetsana nekurambana musati maona mberi.

Tasikirwa moto muziso,
Muchoto toisirwa nyoro dzinotosvora,
Pedze voti tisarudzei tiise dzinobaka rimi,
Mangwana chaiye zvose izvi zvinochinja,
Mutsetse ukava chiitiko chanezuro.

Kusiri kufa ndekupi

Ndiye muwakidzani wandinofungira,
Kuti akaba mbudzi yangu iya chena,
Pandakaishaya akabika zvinonhuhwira,
Kwaturai chaizvo musadzore tsvimbo,
Kusvika asiya nyemba, kufuga rake ega.

Ngatibvute yavo minda minyoro,
Iyo yakapfuma inovapa raramo,
Kana ichinge yaruma vachadzoka zvavo,
Tovapa riya basa remumba yekubikira,
Vachipona nokudya mafufu segonzo.

Bata muroyi wapedza nhiyo dzavahosi,
Kwake kumusha kunozivikanwa nengozi,
Musanyengerera makudo neanokamhina,
Sasikei pamoto pashaye donwe reropa,
Dakara wake mweya wasiyana nenyama.

Munhu mutema, ane ganda gobvu,
Ngaashande; anetsa orohwa gwati,
Riya ganyamuto chidzipura nenyama,
Rake zororo richauya mangwana,
Paachaenda kwamupfigwanebwe.

Tatora minda yedu yechisikirwa,
Zvomopanana paushamwari hwenyu,
Pachenyu, mai nhiya vozvionera,
Vaivepi pamairwa nevapambepfumi,
Muchiora tsoka nemanyeketera.

Tora iyoyo mombe yamashanga,
Muidzidzise chirungu kuverenga,
Bedzi pakati muka, shanda, mhanya,
Mubate kumeso arambe akakotsira,
Akazungaira, ngaabate chakati tende.

Inhamo yemudzanga kurumwa nekutsva,
Huyanga, hazvina hama kana mutorwa,
Chivendekete onongedza chimedure,
Uyu ane udyire, uyo ane hudzvanyiriri,
Ndizvo ndizvo, kusiri kufa ndekupi!