Warima nechisi

Chave chinguva rabuda kumabvazuva,
Zvino rorerekera kurowa nhongonya,
Zvapindirana zuva nemwedzi, wagara,
Watema pasi wamhura Musikavanhu,
Chimotsi, yawe nguva yechisi!

Nhasi mahakurimwe!
Badza wosendeka kupa ruremekedzo,
Gara warega kupinda imo mumunda,
Ungawarairwa wodenha zvakazvigarira,
Ukachibata chakati tende!

Unozvionera pamhuno sefodya,
Wanaiva wega ukarohwa nemheni,
Yechimvuramabwe yokuparadzira musha,
Munda wose wopera nengozha nendongwe,
Ndumure dzoita ndururani misikanzwa!

Kuremekedza tsika dzechivanhu,
Dunhu nenharaunda yatinorarama,
Inguva yematare kutonga dzemwedzi wose,
Madzimai mumapindu kudiridza miriwo,
Pwere dzofaranuka kutamba madiro!

Pachati ruchenje, rikati, jenaguru nemhindo,
Mutumbi kufa, mamwe makumi maviri nemasere,
Kachana kuzombatazve chimwe chimotsi,
Zvachiri chishanu kupera kwesvondo kudai,
Chipembera nemukombe wakazorodza nyama!

Varume ndevamwe

Havana zvizhinji zvinovanetsa,
Kupinda vovana zvavanoda vobuda,
Vakapakata papfudzi sahombarume,
Kwete kusvorotenderera nhando,
Takabva neko kumhunga hakuna’pwa.

Panotsva ndebvu kudzimurana,
Pasina kubvunzana twakavanda,
Afirwa agara haaringwi kumeso,
Hazvinei kushaya kana kuwana,
Maoko kuwanda kutsonza ndima.

Kumba kusvika pwere dzorota,
Ungazopfuurwa nemafaro uwete,
Warara aenda nemuromo wake,
Kubasa womukira mashambanzou,
Kunaka kwehope hakuna ndima.

Kana ihwo hwukamasahwira,
Hungori paganda, haunyanyodzika,
Chero, akuruma nzeve ndewako,
Kungoitira kuti hwahwa hutapire,
Kuvaraidzana, kusesedza nguva.

Zvanzi bhururu venyu ari panze,
Hongu, ini ndogutsurira musoro,
Tatamba makore anokwana mashanu,
Kudya pamwe gango nejenamuponesi,
Asi nezita rake nanhasi handirizivi!

Yagara inongowa mukoma-mudhara,
Ha-a, hamuite mukoma makapenga,
Paushamwari hwedu tichikwenyana,
Heyi, mudhara muri kumberi mhani,
Kure uko, sechigaro chamufundisi!

Munyanyazi

Rwizi rweupenyu, Munyanyazi!
Kutangira iko kumakomo eChimanimani,
Gonyo, rwomonyoroka kusvika kuno zasi,
Turukova vanaShinja twowana pokuturira nhuna,
Rwopfuurira kunorutsira muna Odzi,
Potodongorera kubata mhiri kuna Save,
Otakura mikwende yedzimwe dzose nzizi,
Kunorasira mutoro kugungwa remabvazuva.

Kusanganiswa narwo rwizi muponesi,
Rwusinganeti kuerera ndira kusvika zvita,
Rwoseyama parinopisa rechirimo,
Tichirima koroni mumapindu emudimba,
Nekudiridza migero kubva mune irwo rwizi,
Painonaya yezhizha toshanyura makura,
Torwupa mukana wekufema, rwofaranuka,
Yanaisa kubva rwofashamira pamadiro.

Dunhu rese rine nyota nenzara,
Rochera pachena chipo chanyadenga,
Zvinogutsa diti, simba rako chete,
Yekunwa kana yekubikisa,
Mangwanangwana rwuchakadzikana,
Tsvina yevakageza mauro ichakateramira,
Kusvika kumba pakare tofashamisa,
Kubvisa hwasaririra hutachiwana.

Idzo mhuka dzinorura dzesango,
Kana dzose dzatinoda dzepamusha,
Dzinoda chekunwa zuva nezuva,
Ndiko kuita mufudzi wakanaka,
Kana yanaya kubva ave machikichori,
Dzagarika naivo mafuro manyoro,
Tsanga dzodadisa imo mumahombekombe,
Mionde yoita zvekunwira muvhu.

Kana kugeza ndimomo zvakare murwizi,
Nharaunda yese ndipo payakatarisira,
Dzingawe hembe kukwesha paruware,
Kana man’a padzviva tokwiza nedombo,
Pedze tozora girisi rengoro zvione kufambika,
Varume kuswera mumvura hanzi tageza,
Madzimai kuJero vomirira kwodoka varege kuonekwa,
Machinda orova manja nechekure vaone kuyambuka.

Hove isharaude mhando nemhando,
Zhinji ndidzo diki, madere nemakwaya,
Magakanje nemakwama kune vakashinga,
Hombe dzesirivha dziri mune akadzama,
Tenderere, akateramira anochengeta nengwena,
Kana rave jezi tovana mikonzvi nemikunga,
Dzorasirwa kunze kana rwizi rwashatirwa,
Isu vamwe toboza tichikanda pamoto.

Vasharukwa vokukuzva mudziva reChigarandega,
Mavanobata dzino hove huru dzinenge nyenye,
Madzimai havapedzi kudiridza avo mapindu,
Vobuda vakapakata usawi, chemberedzagunhana,
Tukomana twoswerorova nyaroso muJorodhani,
Chamunyurududu, twotamba chisveru mumvura,
Vasikana voita zvekugarira mugomo makuhwa,
Vachirova chikwee, ruzha rwunobvarura nzeve!

Kukunda kubatsirwa

Kudzidza hakuperi,
Iko kugara nhaka kuona dzevamwe,
Mumamana umo matinovhakacha,
Chitsva chagara chiri murutsoka,
Motosangana neshamwari itsva,
Dzine mirairo nematambiro matsva.

Asika zano pangwa une rako,
Dziya tsika dzatakadzidza pakuyaruka,
Vavakidzani vachitichengeta savabereki,
Kutirova misikanzwa zvaisada mvumo,
Wotokotsa muromo zvirege kusvika kumba,
Vabereki vakazvinzwa zvakare worikitwa.

Zvikoro zvatakaenda zvakatiumba,
Dzingave svomho kana madimikira,
Kana iyo mitambo yakasiyanasiyana,
Kutanga kushanda kudzidziswa nenyanzvi,
Tichidongorera nepamabendekete,
Zvino zvotiyambutsa mhiri kwaLimpopo!

Kuziva mbuya huudzwa,
Nevagara vaziva kuti ndimbuya,
Nhasi wave mazvikokota wemandorokwati,
Zvowovana chipatsurirana nevasina,
Kutsanyira vamwe vaye vavata nayo,
Wotenda Musiki mumweya nemunyama!

Kapazi kamwe nakamwe kubva muhucheche,
Kunzwa nekuratidzwa, kufunda nekufemba,
Zvatakadzidziswa mudzimba kana kuchikoro,
Takashanda nesimba asi kukunda kubatsirwa,
Chiyambutsa vamwe kana wave mhiri,
Worega kushamisira kutaura kwewabaya!

Yanaya rave jezi

Takaribika doro paMasoso,
Ropa raMusikavanhu rofadzwa,
Bva isu vanhu toropafadzwa,
Chiya chamupupuri chamaichiva,
Rotevera kuvhuvhuta dutu guru,
Yakazonaya dzvotsvotsvo kumakomo,
Yechimvuramabwe, matsanza semazai,
Rave jezi, rwizi rwofashamira!

Rarai kani vasikana, munomhanyirei?
Ipo parupasa tichikurukura chinyakare,
Chipitipiti akazvara chimwandamwanda,
Munoeredzwa tambokuyambirai kudai!
Moda kutirovesa mhere yamazhambe,
Tinozviziva kuti muchangobva kuvanikwa,
Imba dzamuchaita zvekuramba manjemanje,
Pedze motizwa navo vamunomhanyira!

Imi vakuru munoda kuedza kudini?
Manatsamukanwa endonda kurota ichiyamwa,
Manonoka kukanda nhano, mukana wapfuura,
Haisisiri nguva yekuyambuka, rwashatirwa,
Minda yemudimba yose tarirai yakukurwa,
Kwozoti imi zvenyu nekudhakwa kwamakaita,
Naro gosoro ramunaro semuchapfira bapu,
Kutorara kuno mhiri mozomukira rwaserera.

Majaya aya indururani ngavasadaro,
Misikanzwa chaiyo kushamisira,
Kuyambuka vakabata muswe wemombe,
China manenji hachifambisi,
Pairi nhasi hapajairiki, yofemera pamusoro,
Yakoromora nzombe mbiri takatarisa,
Ngavadzikame hana, zvinopfuura izvi,
Chimwe nachimwe chine nguva yacho.

Kwodoka, kana iyo mhepo yopitirira,
Raenda zuva rinopisa kuti mvura isasauke,
Iro ivhu rabatwa nechando, yamira kunwirira,
Asi chisingaperi chinoshura, inoserera chete,
Kana roti kwii mangwana rudziyakamwe,
Idzo hove dzakandirwa kumahombekombe,
Kungofumojorera tichikandira muhari,
Chavira pasi mudzimu vembwa!

 

Kuya kutsime

Kuya kutsime,
Zuva nezuva,
Kukwira nekudzika,
Kaviri kana katatu,
Kunochera chinwiwa chanyadenga,
Pakuti tiri mvura patimire!

Pawainzi enda kutsime,
Udzoke wakadengezera,
Mugoro wakati pamupamu,
Dzikama irege kufachukira,
Zvaisava nyore bodo,
Kwaitove kusunga dzisimbe.

Kuzoti wati yarukei,
Masamba zvino asiyana,
Zvoreruka, basa wajaira,
Wobvuma rwendo une rwako mberi,
Mukana wekuona wako mukomana,
Musoro padivi nekunyaririra,
Musasa wopinda basa kupurwa mashizha,
Kusvika bazi rave shamhu!

Waiti uchazvarawo dzako,
Mhandara shanu zvivhindikiti,
Dzokuyamura mabasa epamusha,
Kunyanya kuenda kuya kutsime,
Zvino zvavapararira nyikamukanza,
Zvakare woshaya mubatsiri,
Kutsime wotozviendera,
Potse ungatorara nayo!

Chinokura chinokotama,
Musoro waro gudo tonokoresa,
Makore apindana, bvuma wakwegura,
Mabvi kugonya zvorema,
Makumbo ave matanda,
Kufamba wotoda matatu,
Mvura inokosha usinayo!

Kuya kutsime yave ngwavaira,
Rwave rwendo rwezuva rose,
Nekachigubhu kanokwana yekunwa,
Yekubikisa wotovimba nevavakidzani,
Kushamba kwokosha sendarama,
Kamwe pagore hembe yenherera.

Rwangu rudo rwakadzama

Rwekutanga ndirwo rudo,
Rwunocheka kudzika zvakadzama,
Rwausingakanganwe kana narini,
Nyangwe kuuyei, kana zvaita sei,
Nekusingaperi, kundida kabisira!

Unoyeuka here kuye kurwizi?
Kwataichera makurwe tose,
Pedze tozorora mubvute remuonde,
Wakazembera pane rangu bendekete,
Mangu muhana uri chirambakusakara!

Zvino wavanana neshoroma mubvakure,
Hupfumi woita zvekukava negumbo,
Asi zvasvika panguva iya yerudo,
Ndangariro dzoita musengwa neni,
Nekuti ndakakusiira chikokoko changu!

Kudoedza kumupfekedza uya mucheka,
Mutema, wandaiti ndikati pfe-e,
Hana yako yodandangura ngoma nerudo,
Ngaatsvage zvimwe pakuti hazvifanani,
Haasiri ini, chituru chamambo hachigarwi!

Kufunga wochimbidza isati yakora muto,
Sekuti wavanikidzwa uchinyemwerera,
Wongoti bedzi pfungwa dzaive kure,
Nguva ndichigwedere, yaenda haidzoki,
Asi mudzako ndangariro ndiri wemo seman’a!

Kudoenda kuya kumatongo kwatakasangana,
Worindira, kucheuka uchiti pada ndichati nzwe-e,
Kana iya nziyo yataiti ndeyedu,
Manzwi ayo zvino haicharevi chinhu,
Kuiterera yongokuyeuchidza ini.

Hapadiwe manzwi apa!
Une mhuri inokosha chose muupenyu hwako,
Asi hazvinei nerudo izvi,
Rwako vakasiira ini zambiringa munyemba,
Zvinozivikanwa bedzi nehana yako!