Shinja

Ndiripo pamusoro peNyachirongo,
Ndakatarisa bani reMatiashe,
Ndakanuka ndangoshama muromo,
Nyika yakanaka iyi wedu-we!

Kufunga ndakakurira nyika dzino,
Kana neni ndinozviramba,
Ko nei ndaisazviona ndichiyaruka?
Ndichishuwira nzvimbo dzevamwe.

Nguva yafamba ndichingoyewa,
Kana nzara kuinzwa bodo,
Ndatanga ndiri munzviru nenhengeni,
Zvino ndawe mumatohwe nechecheni.

Husavi zvemauro hwarongeka,
Nembwa yangu Muroyindishe,
Katsuro zvese nemhembwe tabata,
Mutikiti tombozorora kwemazuva.

Sehoromba ndodzika kuchiro,
Kuremekedza masango, zvokodoka,
Kuti nonoke, mapere otanga kurira,
Ndikapera nechakapedza mbudzi.

Kusvika nekamufambiro keabaya,
Ma’mwana vachirova kamupururu,
Muruwanze, kunditenda nemutupo,
Misodzi yoita seichadonha.

Zvino vamai vondipa manyemwe,
Kumona tsambakodzi yerukweza,
Kuraudza chembere muto venyama,
Kuda kuti harahwa ifire musango!

Hazvindishamisi

Ndakagara zvangu ndazviona,
Kumiramira, vaiwe muchekadzafa,
Nemaziso kuti uri benyumundiro,
Kaendwa haudzoki, musiyadzasukwa,
Mavara kutaima aiwa eshato.

Bva rwagara rudo ibofu,
Poshi, piri, inga vave vashanu,
Kamusarapamba ndakakuzvarira,
Kubva vachatamba mahumbwe,
Haunyariwo here zvino vayaruka?

Shiri ine muririre wayo hairegi!
Ndaingoti kuda zvichashanduka,
Pada nguva, makore ndimufundisi,
Sorojena, zvino wachena nendebvu,
Ndichingoti wega uchaonawo.

Datya hariisvi mumvura inopisa,
Rinotomuka chiriporipotyo rotiza,
Rinokandwa mune inotonhorera,
Yodziiswa mbidyana-mbidyana,
Nenguva, nyorenyore woribika.

Pamwe zvaisvika pakurwadza,
Ndichiti makata kushura materu,
Hakuna rima ringasviba zvakadai?
Chiedza chave kuda kusvika chete!
Zvorokwata rave pedyo nekuibva.

Zvino ndaneta ndongokutarisawo,
Chauya masikati charamba ndima,
Chauya usiku charamba hope,
Madiro, chiita zvako zvaunoda,
Hapana kana zvichandishamisa!

Pasipanodya

Pane angakwanisa kumisa zviroto,
Zvemwanasikana afunga twake,
Kuzvisunungura kubva munhamo,
Yamugare ndare paruzevha,
Paanodadirwa nevakaenda kare,
Vanodzoka nemeso machena,
Anotaima kana nemujiho,
Vakarova mucheno vamandiriri,
Zvino Maidei arota hupfumi,
Mari yebhazi yekuenda yarongeka,
Yekudzoka inoonerwa mberi,
Vadikani kudochema pachiteshi,
Moyo wake kare wazvipira,
Iko kumarimuka, mazivandadzoka,
Asika zvagara havisi nyore,
Kunyanyanyanya zvisina kurongwa,
Kusina hama neshamwari hakuendwi!
Basa harimuki zvekumhanya,
Pekugara panoda mutero vemba,
Pekurara kupawana potemesa musoro,
Zvino pane asisazivi nzira yekutsime?
Sebhazi rinokwirwa nevesevese,
Pasina nguva, nyama dzorwadza,
Chakati kuuya ichi chemamazuva’no!
Kwave kungokwenya, muviri wovava,
Kana shaya kutsenga zvonetsa,
Opona nemasvusvu sepwere,
Tunotapira rave bhanana raibvisa,
Roosvisvina senge ane mavende,
Chiona muviri wonhuhwa rufu,
Veukama nazvo vakatyamadzwa,
Chii chaizvo chaakasiira musha?
Kwoodzoka zvino kekupedzisira,
Nzvimbo yekuzorora vatochera,
Weduwe-e, pasipanodya!

Chimbambaira chiri mupoto

Chimbambaira chiri mupoto
Chiri mupoto
(Chimbambaira chiri mupoto)
Ndodya naniko?
(Chimbambaira chiri mupoto)
Chiri mupoto
(Chimbambaira chiri mupoto)
Simba huya
(Chimbambaira chiri mupoto)
Chiri mupoto
(Chimbambaira chiri mupoto)
Tindo svika
(Chimbambaira chiri mupoto)
Chiri mupoto
(Chimbambaira chiri mupoto)
Kudzi pinda
(Chimbambaira chiri mupoto)
Chiri mupoto
(Chimbambaira chiri mupoto)
Chipo tora
(Chimbambaira chiri mupoto)
Chiri mupoto

Tichirangarira mukoma Tuku

Murambiwa

Paye parainyenga raihwarara,
Mavara aro achitaima sendarama,
Kana iro sadza taiseva neuchi,
Nyeredzi matsatse payaturuka,
Ndikati ndiyeye wandakarotswa,
Chido chemwoyo chandasarudza.

Ragarisika, zvino radzika midzi,
Ave madhunamutuna zuva nezuva,
Rongozhambatata parakazvambarara,
Zvave pachena, mavara aive eshato,
Nhamo mumba yapfunya chisero,
Tokwara ivhu nemuromo sehuku.

Mazita jahwi ndoshoropodzwa,
Murambiwa gotwe ravamuhure,
Akarambwa pamusaka pekunyima,
Tsvina, rwake ruwanze harutsikwi!
Kunhuhwa, mumba make hamugariki!
Unoona nenhunzi kuti makafira gonzo.

Nevasingakuzivi vanongobvotomoka,
Vanamuzavazi vagara vanongonyeya,
Marevo mavi, ndoudzwa magaramwoyo,
Nemeso matsvuku, ndopumhwa uroyi,
Neukasha, sevaivepo tichadana,
Weduwe-e, musawanza kutaura!

Vakanganwa kuti ravo ndiro dzenga,
Chidhakwa chinongotevera ndari,
Nepfambi dzaanoti usavi hwedoro,
Chisingazivi nepadiki kuti kune vana,
Vanoda kuriritira nekuyarutsa,
Unoshaya chaizvo kuti zvimbori pai!

Ini ndini wavo musikana webasa,
Suku nasai, ndoitwa mugandidzanwa,
Changu kupukuta ipo parutsirwa,
Taurai zvenyu, dzangu zvino dzadambuka,
Murambiwa ndotambira nemaoko maviri,
Handingagariri ivo mashura akadai!

Nhasi vanatwo

Mbudzi ichakarodya nyama!
Ndagara ndazviona karekare,
Amai vepano nhasi vanatwo,
Maroverwe ari kuitwa mwana?

Iko kanyama kasina godo,
Kamupungurunje kandinodisisa,
Nhodzero, mumhu nezviito,
Nyeredzi pameso zvese nenjere!

Paanoti nzve-e shamhu yeMupenga,
Manenji, kupinyura mapfihwa,
Hadyana yose kudubu, bheu!
Ochiona zvino chakapedza mbudzi!

Zvino rangu simba zvaraparara?
Rakaenda ikwo kwakaenda makore,
Kudoti svaa hapana achandinzwa,
Ndoita sendadira parafini muchoto!

Kupoterera, ndazviziva idimikira,
Agara matukirwe aSamusha,
Kunema pwere yavanofarira,
Kufanana nababa kunoparira!

Ini mandigere muberere simu!
Rekeni nemiseve yangu nyamu,
Ndonanga masango anorira pfeni,
Regai nditaraukire mhanduwe!