Hamubviri kureketa

Ivo vaunoti ndeve pedyo,
Wavainwa navo muchikura,
Hama chaidzo dzemutupo,
Dzamaiseva chaenga mose,
Dzaikuda chose uchayaruka,
Ndidzo pedze dzokupandukira,
Kukubaya bakatwa kumusana,
Kana uchinge wabudirira!

Aikazve uchiri mupenyu?
Zvirwere izvi, taiti wakaenda,
Wayaruka zvino wotidadira,
Hauchatizivi zvawave kushanda,
Kushaya kana kumbotiwo dhora,
Wongodya mari yako wega,
Uchingoita zvako zviya zvedoro,
Uchatifunga nerimwe gore!

Iko kusimba unombodyei?
Nekutsvukira wakura seMango,
Unomboita nezveiko iyewe,
Bva chitsvagira muzukuru basa,
Mari unoita yekuzunza seMuzhanje,
Unombotambira yakaita mawandirei?
Magarikire akadai ndeeumbavha,
Rangarira chekuba hachigari!

Kako kamukadzi kanodada,
Handisviki kwako kanonyima,
Ikwo kuonda hakarwari here?
Endesa kwachiremba kamboonekwa,
Zvino zvamunongoti pagore mwana,
Unoda kuti kamire ngenyoka,
Tengesa mota upedze kuroora,
Zvisati zvatitemesa musoro!

Iyo mhandara yako yabva zera,
Inongoramba ichirawa mabhuku,
Nemadhurire oita zvikoro kudai,
Zvino mukwasha achauya rini?
Vakomana vacho vatisingaoni,
Ikaita tsikombi yotyisa varume,
Chigagairwa wani, zviri kumbodini?
Regai zvangu ndikotse muromo!

Rega ndikurume nzeve

Huya ndikuyambire mwanangu,
Chirega kuti tasa pamberi pavakuru,
Gara pasi, zvichati torei nguva,
Handiti wagara wanga wadya?

Nyika yaugere yakanaka kwazvo,
Yaunoshora uchida dzevamwe,
Pameso pako ndeyemanga-manga,
Uchaishuwira mukore unotevera,
Chifara nayo zvinogutsa hana.

Imo mumamana mauchapinda,
Usanyara kuvaratidza dzako nyora,
Haungatizizve mubvuri vako,
Mavanga anoratidza kwaunobva,
Kuti uone kuziva kwawakananga,
Kuda vamwe hunge wazvida pachako!

Dzidza kudya zvakadzikama,
Zvine mwero, kwete kuzvimbirwa,
Zvishoma, usati ndazvionerei,
Sehama dzamai vako pano!
Izvo zvamunorima nemaoko enyu,
Zvinobva kure hazvina anoziva,
Wozvipereka negapu remvura!

Uchawa nesimba zhinji pakuyaruka,
Chiwa chiremera chavari kure,
Unake divi rinotamba neve pedyo,
Uwe muchengeti wemazera ose,
Musimboti wevaduku, vokutarisira,
Usakanganwa kuremekedza vakuru,
Paunoti dzvutu, kupedza nyota,
Ita rimwe uchidira muvhu,
Kupembedza vadzimu, vagokutarira.

Paunozoti kure, wotsvaga shamwari,
Yako yepamwoyo, ine ndoro chena,
Rangarira hapana akarurama zvose,
Mumwe nemumwe ane zvaanotadza,
Asika mukadzi haarohwi mwanangu,
Imbabvu yako, ichengetedze nerudo!

Peta muswe paruzhinji, kuzvininipisa,
Kwete kugara mutonono pane vanyarikani,
Kungobweteketa sedzisimo pane vamwe,
Hupenyu imhindupindu zvaunoona,
Irombe richaenda pakudzoka iduma,
Usaseka vamwe kana uchinge wayambuka,
Hukuru hunoonekwa nekusimudzira vamwe.

Shinja

Ndiripo pamusoro peNyachirongo,
Ndakatarisa bani reMatiashe,
Ndakanuka ndangoshama muromo,
Nyika yakanaka iyi wedu-we!

Kufunga ndakakurira nyika dzino,
Kana neni ndinozviramba,
Ko nei ndaisazviona ndichiyaruka?
Ndichishuwira nzvimbo dzevamwe.

Nguva yafamba ndichingoyewa,
Kana nzara kuinzwa bodo,
Ndatanga ndiri munzviru nenhengeni,
Zvino ndawe mumatohwe nechecheni.

Husavi zvemauro hwarongeka,
Nembwa yangu Muroyindishe,
Katsuro zvese nemhembwe tabata,
Mutikiti tombozorora kwemazuva.

Sehoromba ndodzika kuchiro,
Kuremekedza masango, zvokodoka,
Kuti nonoke, mapere otanga kurira,
Ndikapera nechakapedza mbudzi.

Kusvika nekamufambiro keabaya,
Ma’mwana vachirova kamupururu,
Muruwanze, kunditenda nemutupo,
Misodzi yoita seichadonha.

Zvino vamai vondipa manyemwe,
Kumona tsambakodzi yerukweza,
Kuraudza chembere muto venyama,
Kuda kuti harahwa ifire musango!

Hazvindishamisi

Ndakagara zvangu ndazviona,
Kumiramira, vaiwe muchekadzafa,
Nemaziso kuti uri benyumundiro,
Kaendwa haudzoki, musiyadzasukwa,
Mavara kutaima aiwa eshato.

Bva rwagara rudo ibofu,
Poshi, piri, inga vave vashanu,
Kamusarapamba ndakakuzvarira,
Kubva vachatamba mahumbwe,
Haunyariwo here zvino vayaruka?

Shiri ine muririre wayo hairegi!
Ndaingoti kuda zvichashanduka,
Pada nguva, makore ndimufundisi,
Sorojena, zvino wachena nendebvu,
Ndichingoti wega uchaonawo.

Datya hariisvi mumvura inopisa,
Rinotomuka chiriporipotyo rotiza,
Rinokandwa mune inotonhorera,
Yodziiswa mbidyana-mbidyana,
Nenguva, nyorenyore woribika.

Pamwe zvaisvika pakurwadza,
Ndichiti makata kushura materu,
Hakuna rima ringasviba zvakadai?
Chiedza chave kuda kusvika chete!
Zvorokwata rave pedyo nekuibva.

Zvino ndaneta ndongokutarisawo,
Chauya masikati charamba ndima,
Chauya usiku charamba hope,
Madiro, chiita zvako zvaunoda,
Hapana kana zvichandishamisa!