Category: Nhetembo

Kurova kwehana here, kuti tsemu?
Hameno zvinoita hura kukakatana,
Kune mumwe chete wavakarotswa,
Kutanga kumuonera kutsi kwehope,
Kuzoti ba-a, kubva wodonha tsiriri,
Nyeredzi matsatse ikati yaturuka!

Kuda ndeuya wechihwande-hwande?
Dai akangoti mwedzi mina kasikei,
Baba vatombi vasati vakutanga,
Chinomboita asave wako ndochii?
Chinokutambudza siku nesikati,
Kumuda moto’bva bedzi kabisira!

Pamwe ndiye’yu anogarozvireva?
Panopano, “Ndinokuda ufunge!”
Nyangwe zurori akarara achikurikita,
Achikutarisa anongoona mudziyo,
Kupondwa newaunoda kurangwa?
Iwe zii zvako, ndiwe wakaperera.

Kana ndewako asingatsukunyuki?
Nehama moita mukomberanwa,
Makobvu nematete, iye kana bufu!
Zvazvo mumoyo mombe achidemba,
Rese danga rakaenda richikuma,
Kusara oseva nasimuka tienzane.

Hwechirume rudo ruri pamari?
Kunyima wake ndokushaya hanya,
Anofanira kumuitira kese-kese,
Kunyangwe iye asingazvikwanisi,
Ngaaende Marimuka anopambara,
Ozodzoka akabata mazakwatira!

Hwamai ndehwemakangiro here?
Mumba yekubikira zvese nekurara,
Rukati gare-gare rwotanga kutama,
Mvura, kutomira-mira kukwiza man’a,
Nekuombera zvamapihwa naSamusha,
Morega kuropodza zvisina maturo!

Ndinokuda zvangu ufunge!
Zvinotonetsa kutsanangura,
Manzwira ewangu mwoyo,
Kutaura ndoita kuzevezera,
Zvoita idonhe misodzinyina.

Dairawozve ndichikushevedza!
Kusuka wopedzisa mbaimbai,
Ndibate, ita zvekundimbundira,
Undipomhodze ndonzwa kutsva,
Chishuwo chandisveta simba!

Chigara pasi ndirondedzere,
Paunoti nzve-e hana inorova,
Kusimudza mhepo dzemuviri,
Zvoita ndipindwe nechando,
Ona kuonda, angove mapfupa!

Kuumbwa wakaumbwa wena!
Ndashaya kana chinoshoreka,
Nyemwerero inonyungudutsa,
Asika chii chiri mubvudzi rako?
Chandisunga pfungwa, ngetani.

Kana zviome sei, uri musimboti!
Ndagumburiswa kumanginde,
Iwe unoziva pekutsvanzvadzira,
Sehandira ndoshushira paruzhinji,
Vemari vasati vandibatisa pasi!

Uri ndarama wangu, chiwanikwa!
Vazhinji vanomhanyira zvinonaka,
Poita vaya vemidziyo inodhura,
Iwe uneni, ndokuisa mumambure,
Ndinokuda zvekuti dhu-u!

Ndiko kurumwa nechekuchera!
Ndini ndakakubata pangonetesa,
Tezvara vakati ungomuroora chete,
Ukasadaro unovhunika mitezo!

Zvichitanga zvakambonakidza,
Kwechinguvana takambopembera,
Tichidaidzira, “kuno tigere bho-o!”
Nhamo kuinzwira kuvavakidzani.

Handizivi chakati uchinge moyo,
Zvimwe kudzika midzi kwawaita!
Zvavawe kungopakurira rako divi,
Kuda ndivo mabhuku avakamedza?

Zvino dzatungana mudanga,
Woda kuramba murume, shereketa,
Waona kuonda kwangu nhasi?
Rega, zvitori bho-o zvakadaro!

Hwagara upenyu une nharo,
Dzinde wasima wotodiridzira,
Rudo moto runokuchidzirwa,
Pada rungadzoke kupupira.

Zvezera rangu ini ndambozama,
Zvandawe rombe, wondiramba,
Enda zvako, hazvina mhosva,
Uchandifunga nerimwe gore.

Tichaonana shure pakuyambuka,
Unochekera iwe ndakutsanyira,
Wochiona wanyengwa neSvikiro,
Upenyu hwese uchiridza hosho!

Dai hwaidzokororwa,
Daidada neupenyu hwangu,
Kuremekedza vangu vabereki,
Kuvimba neshamwari dzangu,
Vose vagomhanyira kwandiri,
Ndoregedza kuzvifananidza,
Kukuridzira rangu tarenda,
Kusashushikana ndisingagoni,
Fodya haina shura sedoro,
Asi ndaisiyana nekuiputa,
Kuchengetedza wangu muviri,
Ndorega dzungu, kudzikama,
Kudya zvine mwero, zveziya,
Ndongoyewa yechisikirwa,
Ndakakomberedzwa nerudo,
Ndaiwe nezvese zvandaida,
Chandaimhanyira mari chi-i?
Ndazadza matanga mashanu,
Asi ndawe hari yofanzirofa,
Pedyo nekufuga rangu ndega,
Ndisina kana nemuchengeti,
Upfumi hworema kutakura,
Ndananga kwamupfiganebwe,
Kunoendwa angori maoko!

Kuzvimiririra kunoda kushinga,
Kutokwinya, kushanda nesimba,
Worega kumirira vanozvishandira,
Kana wanyimwa woridza tsamwa,
Womupomera zvese zvakashata,
Kuna mai, sekuru nehuku dzese,
Ziva paunonongedza chigumwe,
Zvitatu zvakanongedza kunewe,
Rushambwa harubvi nemvura,
Negosoro kana nekupopota,
Nekurwunemera kune vamwe,
Paunoti hutsinye, zvitarise,
Ko-o, ako mabasa akarurama?
Zvanzi nhingi anonditaura,
Zvausinganeti kuropodza vamwe?
Pindu, pano pane tsvina,
Kumba kwababa vako kuri nani?
Pedze, he-e uyu unonyima,
Zviri nyore kugova chisi chako,
Cheziya rako chinoremekedzwa,
Vhara bako kana wosunga dzisimbe,
Umire kugaronongedza vamwe.

Vafana vemazuvano chiramwa!
Panopano kuridza tsamwa,
Ndezvako izvo, handikendenge,
Vajaira dzavo nharembodza,
Kumasaisai kwavanoswerotandara,
Kare kwedu vaiwe moyo murefu,
Kukuvara nenhomba wakatarira,
Nyama, uku uchingoseva nemuto,
Dakara mukoma vazofunga kunhonga,
Kufa nenyota makumbo ari mumvura,
Potse-potse waitofira mugota,
Kwaive kutomera man’a nekufambira,
Usati wabvumidzwa kana kugunzva,
Wokumbira rubatsiro kudzinza rose,
Gwevedzi, Munyai naSadombo,
Chindakuda mopanana nenhumbi,
Womirira rudo rwupise semarasha,
Usati vatemwa rusambo nedanga!

Gwaro renyu madzibaba ndariona,
Handikutema kwekubatanidza ukama,
Mamiriro ezvinhu tese tinoaziva,
Ndozviwanepi, chingwa netsvigiri?
Pazvinwiwa tichatoronda nhimbe.

Vakarabwa mune idi here shuwa?
Kundibhadharisa makandinzwanani?
Musadaro, inga muri vanyarikani,
Wenyu munomutarisira kutya kani?
Mukunda ndiye nyakundipfimba!

Kupfunya chisero, tsika dzenhema,
Ndakamuona achitamba kongonya,
Muzavazi mumamana matigere,
Nyangwe aikutekenyai ndebvu,
Hazvichabviri kurova gusvi.

Mwanasikana ndimapfumise!
Asika nongaivoka zvine mwero,
Chisiyanai nezviripwaripwa!
Hazvichadi pwanyaruzhohwa,
Ndakamuziva awa nengura.

Tasvika pano tichiti tichabuda,
Zvomoda tivake seri kwedanga,
Kukuvharirai mhumhi nemapere,
Ndinizve ndokurimirai gombo,
Chuma chandabvisa chishoma?

Kuumbwa akaumbwa zvake semusuva,
Hatishori, asi tarirai maziso kutsvuka,
Zvakumanakumana neufende hwenguruve,
Zvakare akafura vadzidzisi nerekeni,
Imbeu inosimwa kumucheto kwemunda!

Zvinenge zvave neudyire vadikani!
Rusambo rudzii, inzwai kuchema,
Yechimanda ndeyei asina pamiviri!
Tarakita ndiro rave danga rinotsika?
Bva chengetai, todzoka tavana pfuma!